Dëmtoi shenjat e trafikut në Veri, arrestohet një shtetas i Serbisë
Një shtetas i Serbisë është arrestuar të shtunën në Leposaviq, nën dyshimet për vandalizëm të dy shenjave të trafikut në këtë komunë, pasi ky i fundit dyshohet se dëmtoi tabelat me emërtime në shqip të vendbanimeve në Veri, duke i mbuluar me ngjyrë.
“Është arrestuar i dyshuari mashkull/s, shtetas i Serbisë për shkak se i njëjti dyshohet se i ka dëmtuar dy shenja të trafikut. I dyshuari me vendim të gjyqtares është dërguar për procedim në gjykatën për kundërvajtje”, ka njoftuar policia përmes raporit 24-orësh.
Javën e kaluar, Ministri i Mjedisit, Planifikimit Hapësinor dhe Infrastrukturës, Liburn Aliu, kishte bërë të ditur se tabelat në gjuhën serbe po zëvendësohen me shenjat zyrtare të vendbanimeve sipas ligjeve të Kosovës.
Mirëpo vetëm një ditë pas vendosjes së tabelave me emërtimet e vendbanimeve me shumicë serbe në komunat veriore në gjuhën shqipe, të njëjtat ishin dëmtuar.
Me shumë se gjysma e tabelave ishin ngjyrosur gjatë natës nga persona të panjohur. Në shumicën prej tyre ishte ngjyrosur vetëm pjesa ku emri i vendbanimit shkruhej shqip.
Por, sipas Komisionerit për Gjuhë në Zyrën e Kryeministrit, Slavisha Mladenoviç, Ministria e Infrastrukturës nuk është konsultuar me Komisionerin për Gjuhë për largimin e të gjitha tabelave të komunikacionit të cilat janë shkruar në alfabetin cirilik në komunat të banuara me shumicë serbe.
“Shenjat në Veri të Kosovës, duhet të jenë së pari në gjuhën serbe, pastaj në gjuhën shqipe. Gjuha e shumicës së banorëve është gjuha primare”, ka thënë ai.
Ndryshe në mbështetje të Mladenoviç-it ka dalë fillimisht shefi i Zyrës së Bashkimit Evropian në Kosovë, Tomas Szunyog e më pastaj e shefi i Misionit të OSBE-së në Kosovë, Michael Davenport.
Si Szunyog ashtu edhe Davenport kanë vlerësuar se autoritetet kosovare do të duhej që para fillimit të procesit të zëvendësimit të tabelave të konsultoheshin me Komisionerin për Gjuhë.
“Me iniciativën e fundit për të zëvendësuar tabelat zyrtare që tregojnë emrat e vendeve në Veri të Kosovës, u bëjë thirrje autoriteteve ta zbatojnë procesin vetëm pas konsultimit me Komisionerin për Gjuhë dhe duke e interpretuar pozitivisht Ligjin e Përdorimit të Gjuhëve”, shkroi Szunyog në platformën sociale, X.
MARKETING
