(VIDEO) Lloga: Kamçev njëri nga sponsorët që shkatërroi PSP-në, Ageler: Do të vazhdojmë të shënjestrojmë individë të korruptuar

Jordan Kamçev është njëri nga sponsorët për shkatërrimin e PSP-së. Emri i tij lidhet me shumë probleme që janë sot në vend, mirë që u gjet në listën e zezë të SHBA-ve. Kështu deklaroi ministri i Drejtësisë, Krenar Lloga. Ministri Lloga tha se si anëtar i Këshillit Gjyqësorë do të kërkojë që të kontrollohen të gjitha lëshimet që janë bërë gjatë procedurës për të gjitha lëndët ku akuzohet Orce Kamçev.

MARKETING

KRENAR LLOGA, MINISTËR I DREJTËSISË

“Me Kamçevin ndodhi ajo që edhe pritej të ndodhë, në fakt që organet gjyqësore të Maqedonisë nuk janë duke e pa. Kamçev është njëri nga sponsorët kryesorë për shkatërrimin e Prokurorisë Speciale Publike dhe emri i tij lidhet me shumë probleme që janë sot në vend. Më vjen mirë që ai u gjet në listën e zezë të SHBA-ve. Më vjen keq që organet gjyqësore të Maqedonisë nuk e kanë parë dhe nuk vazhdojnë ta shohin atë me syrin të cilin e sheh edhe qytetari në vend”.

Ndërkaq, Ambasadorja amerikane në Maqedoninë e Veriut, Angela Aggeler pas vendimit për ta përfshirë në listën e zezë biznesmenin, Jordan Kamçev, u shpreh se SHBA-të do të vazhdojnë të shënjestrojnë individë të korruptuar.

ANGELA AGGELER,AMBASADORJA AMERIKANE NË MAQEDONINË E VERIUT

“Këto sanksione nuk ndikojnë vetëm te kompanitë dhe pronat e Kamçevit, por edhe te ata bashkëpunëtorë të cilët kanë bërë biznes me të. SHBA do të vazhdojnë të shënjestroj individë të korruptuar të cilët rrezikojnë sundimin e së drejtës dhe stabilitetin e Maqedonisë së Veriut. Korrupsioni ka pasoja”.

Ndryshe, të mërkurën Departamenti amerikan i Thesarit sanksionoi Kamçevin me arsyetimin se e ka abuzuar pozitën që e ka pasur. Sipas Zyrës për Kontrollin e Aseteve të Huaja, brenda Departamentit amerikan të Thesarit, Kamçev është përfshirë në aktivitete korruptive dhe e ka çuar përpara një agjendë egoiste në kurriz të institucioneve dhe qytetarëve të Maqedonisë së Veriut.

Samir Mustafa /SHENJA/