VMRO-DPMNE: Me çfarë është shantazhuar Arben Taravari?
Partia në pushtet VMRO-DPMNE ka reaguar ashpër ndaj deklaratave të fundit të Arben Taravarit, liderit të krahut të Aleancës për Shqiptarët (ASH), duke e akuzuar për mungesë konsistence dhe standarde të dyfishta politike.
Reagimi vjen pasi ASH hodhi akuza ndaj partnerëve aktualë qeveritarë të koalicionit VLEN – përfshirë VMRO-DPMNE-në, ZNAM-in dhe Partinë Demokratike Serbe të Ivan Stolkoviqit – duke i cilësuar si burim të “së keqes” brenda qeverisë, e jo opozitën shqiptare.
“Sot, VMRO-DPMNE është ‘e keqja’, ndërsa vetëm dy muaj më parë, Taravari ulej krenar në Qeveri me të njëjtën VMRO-DPMNE,” thuhet në deklaratën me shkrim të partisë së Mickoskit.
VMRO-DPMNE e ironizon lëvizjen e Taravarit, duke e krahasuar me një “nuse të re që vazhdimisht e ndërpret dasmën”, për shkak të vendimeve të përsëritura për t’u futur dhe dalë nga koalicionet qeveritare.
Partia ngre pyetjen nëse Taravari është nën ndonjë formë presioni:
“Me çfarë është i shantazhuar Taravari dhe sa herë do ta shesë të njëjtën histori?”
Sipas VMRO-DPMNE-së, problemi kryesor nuk është ndonjë mospërputhje ideologjike, por qëndrimet e paqëndrueshme të Taravarit. Ata e akuzojnë për hipokrizi dhe për ndryshim të qëllimshëm të retorikës, në varësi të funksioneve që merr ose jo në qeveri.
“Taravari ose nuk di çfarë flet, ose e di shumë mirë, por ndryshon pllakën për të justifikuar hyrjet dhe daljet e tij nga koalicionet,” theksohet më tej në reagimin zyrtar.
VMRO-DPMNE sjell edhe një kronologji të zhvillimeve politike që lidhen me Taravarin:
Në shkurt 2024, Taravari deklaroi publikisht se si VMRO-DPMNE ashtu edhe LSDM e konsideronin bllokun e tij si partner të dëshiruar. Ai pranoi se kishte marrë oferta nga Ali Ahmeti për pozita të rëndësishme, përfshirë atë të kryeministrit të parë shqiptar dhe kandidatit për president.
Në qershor 2024, Qeveria u votua me përfshirjen e VMRO-DPMNE-së dhe koalicionit opozitar shqiptar VLEN.
Në maj 2025, ASH e Taravarit u largua nga VLEN, duke akuzuar për premtime të pambajtura – megjithatë, një pjesë e partisë së tij mbeti në Qeveri.
Nga kjo, VMRO-DPMNE konkludon se veprimet e Taravarit nuk lidhen me parime apo ideologji, por ndoshta me interesa personale apo ndikime të tjera.
MARKETING
