(VIDEO) LSDM propozon shtatë masa për ringjallje ekonomike
“Në vetëm tetë muaj, jemi dëshmitarë të një përkeqësimi dramatik të situatës ekonomike në vend dhe një rënie të standardit të jetesës së qytetarëve”. Kështu tha sot nënkryetarja e partisë opozitare LSDM, Kaja Shukova, duke theksuar që të dhënat e fundit ekonomike janë shqetësuese.
MARKETING
Kaja Shukova, nënkryetare e LSDM-së
“Gjithçka është shtrenjtuar. Çmimet e ushqimeve janë rritur me 20%, dhe disa produkte janë rritur edhe më shumë. Enti Shtetëror i Statistikave ka matur se kostoja e jetesës është rritur me 4.9%. Faturat e energjisë elektrike janë rritur me 20% në 30% dhe qeveria ka rritur çmimet e ngrohjes me 5% të tjera – që është një goditje e fortë për buxhetet familjare. Pagat janë në stagnim, nuk ka rritje as të pagës minimale dhe as mesatare. Qytetarët kanë çdo ditë e më pak para dhe mezi ia dalin mbanë”.
Ajo thotë se edhe parametrat e tjerë ekonomikë janë gjithashtu të këqia, duke theksuar prodhimin industrial që është ulur me 1.4% dhe eksportet e ulura me 5.9%. Po ashtu, Shukova potencon se edhe Investimet e huaja tashmë po largohen, siç është shembulli i kompanisë “Aptiv”, njëkohësisht thekson se ka edhe njoftime të tjera për mbyllje të reja fabrikash.
Kaja Shukova, nënkryetare e LSDM-së
“Paaftësia e qeverisë së Mickoskit po e shtyn vendin në krizë ekonomike dhe qytetarët me të drejtë janë të shqetësuar. Politikat e shportës kanë pësuar një debakli total dhe qeveria nuk ka përgjigje për koston në rritje të jetesës dhe varfërinë. Ndonëse Qeveria ka paralajmëruar ngrirjen e marzheve të martën, kjo javë ka kaluar dhe vendimi nuk është marrë. Natyrisht, interesi i elitës së biznesit për qeverinë është më i rëndësishëm sesa mbrojtja e qytetarëve”.
Ndërkohë ajo thotë se LSDM ka propozuar një strategji gjithëpërfshirëse ekonomike – një grup prej 7 masash të përkthyera në ligje. Këtu përfshihen ulja e TVSH-së për energjinë elektrike nga 18% në 5%, që do të ulë faturat e qytetarëve për energjinë elektrike deri në 13%, heqja e TVSH-së për produktet ushqimore bazë, ngrirja e çmimeve të produkteve ushqimore bazë për tre muajt e ardhshëm. Propozohet gjithshtu zbatimi urgjent i Ligjit për praktikat e padrejta tregtare, i cili do të ulë çmimet deri në 30%. Kërkohet edhe ulja e çmimit të “kartonit jeshil” për makinat e rritja e pagave në sektorin privat duke ngrirë kontributet.
Anida Murati /SHENJA/
MARKETING
