Shefi i OKB-së bën thirrje për paqe përpara përvjetorit të luftës në Gaza: Koha për të ndalur vuajtjet
Sekretari i përgjithshëm i Kombeve të Bashkuara (OKB), Antonio Guteres, ka lëshuar një apel për paqen përpara përvjetorin të luftës në Gaza nesër, transmeton Anadolu.
“7 tetori është natyrisht një ditë për t’u fokusuar në ngjarjet e asaj dite të tmerrshme. Unë shpreh solidaritetin tim me të gjitha viktimat dhe të dashurit e tyre”, tha Guterres në një video-mesazh.
Ai tha se sulmi nga grupi i rezistencës palestineze Hamas në atë ditë “shkatërroi shpirtrat” dhe kujtoi të gjithë ata që u vranë dhe pësuan “dhunë të papërshkrueshme”.
“Kjo është një ditë që komuniteti global të përsërisë me zërin më të lartë dënimin tonë të plotë të akteve të neveritshme të Hamasit, duke përfshirë marrjen e pengjeve”, tha ai.
Shefi i OKB-së theksoi se një valë tronditëse dhune dhe gjakderdhjeje ka shpërthyer që nga 7 tetori.
“Lufta që pasoi sulmet e tmerrshme të një viti më parë vazhdon të shkatërrojë jetë dhe të shkaktojë vuajtje të thellë njerëzore për palestinezët në Gaza dhe tani popullin e Libanit. Është koha për lirimin e pengjeve. Koha për të heshtur armët. Koha për të ndalur vuajtjet që kanë përfshirë rajonin. Koha për paqen, ligjin ndërkombëtar dhe drejtësinë”, theksoi Guterres.
Ai gjithashtu bëri thirrje për një zgjidhje të qëndrueshme të konfliktit për të lejuar Izraelin, Palestinën dhe të gjitha vendet e tjera në rajon të jetojnë në paqe dhe dinjitet, si dhe me respekt për njëri-tjetrin.
Duke shpërfillur rezolutën e Këshillit të Sigurimit të OKB-së që bën thirrje për një armëpushim të menjëhershëm, Izraeli ka vazhduar ofensivën e pamëshirshme në Gaza pas sulmit nga Hamasi tetorin e kaluar.
Që atëherë, të paktën 41.800 palestinezë janë vrarë, shumica prej tyre gra dhe fëmijë, si dhe rreth 97 mijë të tjerë janë plagosur. Sulmet izraelite kanë zhvendosur pothuajse të gjithë popullsinë e territorit mes një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për veprimet e tij në Gaza.
MARKETING
