SHBA lëshon alarm sigurie në Lindjen e Mesme: “Siguroni ushqime dhe strehim”, Trump kthehet më herët në Shtëpinë e Bardhë

Misionet diplomatike të SHBA-së në Izrael dhe në Lindjen e Mesme kanë lëshuar një alarm të përgjithshëm sigurie për qytetarët amerikanë në rajon, mes rritjes së tensioneve dhe frikës për një përshkallëzim të shpejtë të situatës.

MARKETING

Sipas Ambasadës së SHBA-së në Izrael, Irani dhe grupet e mbështetura prej tij, përfshirë Huthitët, mund të synojnë misionet diplomatike, kompanitë dhe institucionet amerikane në Lindjen e Mesme dhe më gjerë.

Qytetarët amerikanë janë paralajmëruar për ndërprerje të mundshme të fluturimeve dhe mbyllje të hapësirës ajrore në rajon, ndërsa u është bërë thirrje të ruajnë vigjilencën, të sigurojnë rezerva ushqimore dhe ujë, si dhe të shkarkojnë aplikacione për marrjen e njoftimeve në kohë reale.

Në këtë situatë, presidenti amerikan Donald Trump është kthyer në Shtëpinë e Bardhë një ditë më herët se sa ishte planifikuar, pasi ishte larguar për në Camp David, Maryland.

Kthimi i tij i parakohshëm vjen pas alarmit të ri të sigurisë të Departamentit amerikan të Shtetit, i cili u bëri thirrje qytetarëve amerikanë në Lindjen e Mesme të “ruajnë vigjilencën maksimale” dhe të përgatiten për ndërprerje të mundshme të udhëtimit.
“Ky konflikt ushtarak ka potencialin për përshkallëzim të shpejtë”, thuhet në njoftimin e Departamentit të Shtetit.
Ndërkohë, Huthitët e Jemenit kanë deklaruar se të shtunën kanë sulmuar me raketa dhe dronë objektiva “të ndjeshme” në kryeqytetin saudit, Riad.

Sulmet u raportuan disa orë pasi pranë aeroportit kryesor të qytetit u panë flakë dhe një re e madhe tymi. Arabia Saudite kishte lëshuar më herët alarme për rrezik të mundshëm në zonën e Riadit, në një kohë kur sulmet e Huthitëve ndaj mbretërisë janë intensifikuar.

Huthitët nuk kanë specifikuar objektivin në Riad, por kanë pretenduar se kanë sulmuar edhe një strukturë të kompanisë Aramco në Yanbu, në bregun e Detit të Kuq, një nga qendrat kryesore të eksportit të naftës së Arabisë Saudite.

MARKETING