Rusia thotë se Ukraina tentoi një sulm me dron kundër termocentralit bërthamor në Kursk
Rusia pretendoi sot se Ukraina u përpoq të godiste termocentralin bërthamor të Kurskut në një sulm me dron, ndërsa rajoni kufitar vazhdon të jetë skenë e një inkursioni nga Kievi i nisur më shumë se dy javë më parë, transmeton Anadolu.
“Natën e 22 gushtit 2024, regjimi i Kievit u përpoq të kryente një akt terrorizmi bërthamor me një dron kamikaz në një termocentral bërthamor në Kurchatov në rajonin Kursk”, ka thënë një burim nga agjencitë e rendit, sipas agjencisë shtetërore ruse të lajmeve TASS.
Burimi ka thënë se droni ukrainas i përdorur gjatë sulmit është rrëzuar në “afërsi të menjëhershme” të uzinës nga sistemet ruse elektronike të luftës.
Duke komentuar incidentin, zëdhënësja e Ministrisë së Jashtme ruse, Maria Zakharova, ka thënë për TASS se sulmi kërkon një përgjigje të menjëhershme nga Agjencia Ndërkombëtare e Energjisë Atomike (IAEA), duke e përkufizuar atë si një “akt të terrorizmit bërthamor”.
Një ditë më parë, presidenti rus Vladimir Putin pretendoi se Ukraina u përpoq të godiste termocentralin bërthamor në Kursk dhe se Agjencia Ndërkombëtare e Energjisë Atomike (IAEA) është informuar për situatën.
Putin tha se IAEA ka premtuar të dërgonte specialistë për të vlerësuar situatën në uzinë, ndërsa ushtruesi i detyrës së Guvernatorit të Kurskut, Alexey Smirnov, tha se situata në termocentral është e qëndrueshme.
Pas komenteve të Putinit, shefi i IAEA-s, Rafael Grossi, njoftoi synimin e tij për të vlerësuar personalisht situatën në vend gjatë një vizite javën e ardhshme.
Autoritetet ukrainase nuk i kanë komentuar ende pretendimet e Rusisë.
Rajoni kufitar rus i Kurskut është përballur me një inkursion nga Kievi që nga nata e 5-6 gushtit, kur forcat ukrainase hynë në rajon pranë qytetit Sudzha, rreth 10 kilometra nga kufiri.
Presidenti rus Vladimir Putin akuzoi Kievin për kryerjen e një “provokimi në shkallë të gjerë” dhe “të shtëna joselektive”, duke e cilësuar inkursionin si “sulm terrorist”.
Ditë më vonë, Zelenskyy pranoi se ishte një “operacion” nga trupat e Ukrainës, duke specifikuar se qëllimi është krijimi i një “zone tampon” kundër sulmeve ruse.
MARKETING
