Rritet në të paktën 35.800 numri i palestinezëve të vrarë nga sulmet izraelite në Gaza

Numri i palestinezëve të vrarë nga sulmet e pamëshirshme izraelite në Rripin e Gazës që nga 7 tetori është rritur në të paktën 35.800, transmeton Anadolu.

Ministria e Shëndetesisë në enklavën palestineze po ashtu njoftoi se të paktën 80.200 njerëz janë plagosur gjithashtu në ofensivën izraelite.

“Ushtria izraelite vrau 91 njerëz dhe plagosi 210 të tjerë në nëntë masakra kundër familjeve në 24 orët e fundit. Shumë njerëz janë ende të bllokuar nën rrënoja dhe në rrugë pasi shpëtimtarët nuk mund t’i arrijnë ata”, theksoi ministria palestineze.

Izraeli ka vazhduar ofensivën brutale në Gaza që nga 7 tetori i vitit të kaluar, pavarësisht një rezolute të Këshillit të Sigurimit të OKB-së që kërkon një armëpushim të menjëhershëm.

Më shumë se shtatë muaj pas luftës izraelite, zona të gjera të Gazës janë kthyer në rrënoja mes një bllokade gjymtuese të ushqimit, ujit të pastër dhe ilaçeve.

Izraeli akuzohet për “gjenocid” në Gjykatën Ndërkombëtare të Drejtësisë, e cila ka urdhëruar Tel Avivin të sigurojë që forcat e tij të mos kryejnë akte gjenocidi dhe të marrin masa për të garantuar ofrimin e ndihmës humanitare për civilët në Gaza.

MARKETING