Policia izraelite nuk lejon hyrjen e mijëra palestinezëve në Al-Aksa për të falur namazin e xhumasë

Mijëra palestinezë që donin të falnin namazin e xhumasë në xhaminë Al-Aksa në Qytetin e Vjetër të Kudsit Lindor të pushtuar u ndaluan nga policia izraelite, raporton Anadolu.

Pavarësisht lehtësimit të kufizimeve të gjendjes së jashtëzakonshme të vendosura nga Izraeli pas sulmeve të gjera ndaj Iranit, Izraeli nuk lejoi mijëra palestinezë që ishin mbledhur në Al-Aksa për faljen e xhumasë.

Dëshmitarët thanë se policia izraelite lejoi rreth 450 palestinezë të hyjnë në Al-Aksa për faljen e xhumasë. Izraeli lehtësoi kufizimet e gjendjes së jashtëzakonshme të vendosura pas sulmeve të gjera ndaj Iranit të mërkurën në mbrëmje më 13 qershor.

Administrata e Vakëfeve Islame të Kudsit njoftoi javën e kaluar se policia izraelite nuk ka lejuar palestinezët të falen në Al-Aksa si pjesë e gjendjes së jashtëzakonshme.

– “Status quo”-ja në lidhje me xhaminë Al-Aksa

Jordania konsiderohet vendi përgjegjës për çështjet fetare në Kuds, në përputhje me marrëveshjen “Wadi Araba” të nënshkruar me Izraelin në vitin 1994.

Sipas marrëveshjes së nënshkruar mes mbretit Abdullah II të Jordanisë dhe presidentit palestinez Mahmoud Abbas në vitin 2013, e drejta për mbrojtjen dhe kujdestarinë e Kudsit dhe vendeve të shenjta atje sërish iu dha Jordanisë.

Xhamia Al-Aksa, sipas marrëveshjes, është nën kujdesin e Administratës së Vakëfeve Islame të Kudsit, e cila është e lidhur me Ministrinë e Vakëfeve, Çështjeve Islame dhe Vendeve të Shenjta të Jordanisë.

Hebrenjtë të cilët më parë vizitonin Al-Aksën me lejen e Administratës së Vakëfeve Islame të Kudsit, që nga viti 2003 e deri më sot ata nën shoqërimin e policisë hyjnë në vendet e shenjta në kuadrin e vendimit të njëanshëm të Izraelit, i cili shkel sovranitetin e Administratës së Vakëfeve.

Izraeli mbron idenë se po ruhet “status quo”-ja historike në Al-Aksa në të cilën “mund të kryejnë adhurime vetëm muslimanët ndërsa anëtarët e feve të tjera vetëm mund të kryejnë vizita”.

Por, kolonët fanatikë hebrenj janë kapur shpesh në kamera duke u lutur dhe duke kryer rituale fetare gjatë bastisjeve në Al-Aksa nën mbrojtjen e policisë izraelite.

MARKETING