MPJ: Pesë shtetas të Maqedonisë së Veriut, të cilët janë në Gazë, kanë kërkuar të kthehen në shtet

Ministria e Punëve të Jashtme, në lidhje me përkeqësimin e situatës së sigurisë në Izrael dhe Gaza, informon se deri në këtë moment pesë shtetas të Republikës së Maqedonisë së Veriut, të cilët ndodhen në Gazë, kanë shprehur interes për t’u kthyer në vend.

“Kujtojmë se përveç çiftit martesor, për të cilin më herët kishim informacione se ndodheshin në Gaza, në ndërkohë Ambasada jonë në Kajro është kontaktuar edhe nga një familje – baba dhe dy fëmijë, të gjithë shtetas të Maqedonisë së Veriut. Për fëmijët janë siguruar dokumente për kthimin e tyre në Maqedoninë e Veriut, ndërsa nga institucionet kompetente në Kajro dhe Tel Aviv është marrë informacion se të pesë shtetasit janë futur në listën për evakuim, për të cilën pritet vendimi për hapjen e pikës kufitare Rafah”, informoi MPJ.

Gjithashtu, shtojnë nga aty, dy ambasadat e Maqedonisë së Veriut, në Kajro dhe Tel Aviv, janë në komunikim të vazhdueshëm me të gjithë qytetarët tanë, të cilët aktualisht janë të sigurt.

Hapja e pikës kufitare kushtëzohet nga kushtet në terren dhe për momentin pika kufitare është e mbyllur.

“Ndërkohë po punohet në identifikimin dhe mbledhjen e të dhënave për shtetas tjerë që mund të ndodhen në Gaza, për të çka edhe një herë ju rikujtojmë të dhënat tona për kontakt: numrat e telefonit të Ministrisë së Punëve të Jashtme – 075/273- 732 dhe 075/268-736, telefoni kujdestar i Ambasadës në Tel Aviv +972-54-926-7378 dhe telefoni kujdestar i Ambasadës në Kajro +201033615542”, informon Ministria.

MARKETING