MPB bën thirrje që qytetarët të mos bien pre e mashtrimeve me aksidente të rreme, të denoncojnë në polici

Nga Ministria e Punëve të Brendshme sot u bëjnë thirrje qytetarëve që të mos bien pre e mashtrimeve me aksidente të rreme dhe rastet e tilla menjëherë të denoncohen në polici.

“Gjatë periudhës së kaluar në Ministrinë e Punëve të Brendshme nga qytetarët janë denoncuar disa vepra penale të ‘mashtrimit’, të cilat janë kryer ndaj personave të moshuar. Autorët mashtrojnë njerëzit duke i telefonuar dhe duke u paraqitur si zyrtarë, zakonisht nëpunës policorë, dhe u kërkojnë mjete financiare për të liruar nga ndjekja penale fëmijët ose nipërit e tyre, të cilët dyshohet se pak para thirrjes kanë pësuar një aksident trafiku me pasoja fatale”, sqarohet në kumtesën e sotme.

Mashtruesit kontaktojnë viktimat më së shumti në telefon fiks, por ka raste që kontaktohen edhe nëpërmjet celularit me numër të fshehur dhe për t’i bërë më bindës, në sfond dëgjohet një zë që kërkon ndihmë.

“Ministria e Punëve të Brendshme njofton qytetarët se po ndërmerren masa dhe aktivitete për zbardhjen e veprave të deritanishme penale dhe gjithashtu apelojmë qytetarët që të mos bien pre në këtë lloj mashtrimi, ndërsa nëse kontaktohen të lajmërojnë menjëherë policinë”, potencojnë nga Ministria.

MARKETING