Ministri turk Bolat merr pjesë në hapjen e degës së re të spitalit Sante Plus në Shkup

Bolat, i cili ndodhet në Shkup për të marrë pjesë në Forumin e Biznesit Türkiye-Maqedoni e Veriut dhe për kontakte zyrtare, mori pjesë në hapjen e një dege të spitalit Sante Plus që vepron në vend.

Përveç Bolat dhe delegacionit të tij, në ceremoninë e hapjes morën pjesë edhe zëvendëskryeministri i Maqedonisë së Veriut për Qeverisje të Mirë, Arben Fetai, ministri i Ekonomisë dhe Punës, Besar Durmishi, ministri që përfaqëson romët në vend, Shaban Saliu, zëvendësministrat, deputetët turq në vend Salih Murat dhe Beycan İlyas, ambasadori i Türkiyes në Shkup, Fatih Ulusoy, përfaqësues të institucioneve dhe organizatave turke në vend dhe shumë të ftuar.

Në fjalën e tij këtu, ministri Bolat tha se ky objekt shëndetësor do të fillojë të shërbejë si një lidhje e re e marrëdhënieve dhe bashkëpunimit të shkëlqyer mes Türkiyes dhe gjeografisë ballkanike, e veçanërisht ndërmjet Türkiyes dhe Maqedonisë së Veriut.

Ai u shpreh se janë shumë të kënaqur me marrëdhëniet shumë të mira dhe vazhdimisht në rritje ndërmjet Türkiyes dhe Maqedonisë së Veriut në shumë fusha si ato politike, kulturore, ushtarake, tregtare, investimeve, kontraktimeve dhe turizmit. Bolat tha se vizita e tyre do të synojë t’i ngritë dhe t’i rrisë këto bashkëpunime edhe më shumë.

– “Ne do të kemi bashkëpunim shumë më të fortë mes Türkiyes dhe Maqedonisë së Veriut në periudhën e ardhshme”

Ministri turk tha se në Maqedoninë e Veriut kanë patur takime produktive me një delegacion të fuqishëm. Bolat shtoi se kanë patur takime produktive me kryeministrin, Hristijan Mickoski, ministrin e Punëve të Jashtme dhe Tregtisë së Jashtme, Timço Mucunski dhe ministrin e Ekonomisë dhe Punës, Besar Durmishi.

Duke iu referuar kontakteve të tjera të tij në vend, Bolat tha: “Ne do të kemi bashkëpunim shumë më të fortë ndërmjet Türkiyes dhe Maqedonisë së Veriut në çështjet e tregtisë, investimeve, energjisë, mbrojtjes dhe infrastrukturës në periudhën e ardhshme. Jemi të kënaqur që Republika e Maqedonisë së Veriut ka treguar të njëjtin vullnet. Shpresojmë se Türkiye dhe Maqedonia e Veriut do të arrijnë të ardhme më të fortë së bashku, dorë për dore”.

“Jemi të nderuar që një grup i fortë investitorësh nga Türkiyes hap një spital të ri këtu në fushën e shëndetësisë, i cili është një nga pjesët më të rëndësishme të jetës njerëzore dhe për të cilin kemi më shumë nevojë. Reforma të mëdha dhe një revolucion i madh janë bërë në fushën e shëndetësisë në Türkiye. Jemi ndër vendet me shërbimet më të mira shëndetësore në botë. Ne jemi gjithashtu të kënaqur që investimet në këtë fushë po përhapen në mbarë botën dhe në Ballkan. Shpresojmë që të gjithë pacientët nga Maqedonia e Veriut do të gjejnë shërim këtu”, tha Bolat.

Ministri Fetai shprehu kënaqësinë që ishte i pranishëm në këtë hapje. “Ky spital shënon zgjerimin e rrjetit të Sante Plus në Maqedoninë e Veriut, duke iu bashkuar spitaleve në Türkiye, Shqipëri, Kosovë, Mal të Zi dhe Serbi. Është një hap i madh në përmirësimin e shërbimeve shëndetësore dhe një kontribut i çmuar për shëndetin e qytetarëve tanë”, tha ai.

Duke falënderuar grupin Sante Plus në emër të Qeverisë së Maqedonisë së Veriut për këto investime në fushën e shëndetësisë, Fetai tha se hapja e spitaleve të reja kontribuon në rritjen e cilësisë së shërbimeve në fushën e shëndetësisë.

Pronari i grupit Sante Plus Hospital, dr. Bilal Kara tha se ky është spitali i 9-të në Ballkan dhe i 4-ti në Maqedoninë e Veriut që ata kanë vënë në shërbim sot.

Duke kujtuar se investimi i tyre i parë jashtë vendit në vitin 2015 ishte në kryeqytetin e Maqedonisë së Veriut, Shkup, Kara tha: “Sot ne po shtojmë një hallkë tjetër të rëndësishme në zinxhirin e shërbimit, falë punës së përkushtuar të mjekëve tanë dhe profesionistëve të kujdesit shëndetësor nga Maqedonia e Veriut dhe Türkiye”.

– Ministri Bolat vizitoi Universitetin Ndërkombëtar Ballkanik

Në kuadër të kontakteve të tij në vend, ministri Bolat vizitoi edhe Universitetin Ndërkombëtar Ballkanik (IBU) në kryeqytetin Shkup.

Ai zhvilloi një takim me menaxhmentin e IBU-s dhe mori informacion për punimet.

Bolat gjatë kontakteve të tij këtu ishte i shoqëruar nga ambasadori i Türkiyes në Shkup, Ulusoy dhe delegacioni që e shoqëronte.