Minçev: Çdo punonjës i ri në administratën publike do të japë provim profesional
Ligji për përmirësimin profesional dhe trajnimin e nëpunësve administrativë shënon një reformë thelbësore që synon të kapërcejë boshllëkun shumëvjeçar mes aspiratave për një administratë evropiane dhe realitetit të tanishëm. Kështu deklaroi ministri i Administratës Publike, Goran Minçev, gjatë debatit publik me temë “Investim në dije – rruga drejt një administrate më efikase”.
“Me këtë ligj po vendosim themelet e një sistemi transparent, efikas dhe të ndershëm, i cili do të mbështetet në profesionalizëm. Përparimi në administratë do të bazohet në dije, jo në lidhje personale”, theksoi Minçev.
Sipas tij, krijimi i Akademisë për Administratë Publike do të sigurojë trajnime të strukturuara dhe zhvillim të kompetencave për punonjësit shtetërorë. Çdo i punësuar i ri do të ndjekë 120 orë trajnim dhe do të japë provim para një komisioni profesional.
Mbështetje për këtë reformë ka shprehur edhe ambasadori francez në Maqedoninë e Veriut, Christophe Le Rigolleur, i cili vlerësoi se modernizimi i administratës publike është thelbësor, jo vetëm për procesin e integrimit evropian, por edhe për përmirësimin e shërbimeve ndaj qytetarëve.
“Reforma e administratës publike është e domosdoshme për qytetarët që presin një administratë efikase, moderne dhe transparente. Besimi në administratë është themeli i besimit në demokraci”, tha ambasadori.
Le Rigolleur njoftoi për një projekt francez mbështetës për themelimin e Akademisë, i cili pritet të realizohet në vitin 2027, duke theksuar se Franca do të vërë në dispozicion ekspertizën e saj më të mirë.
“Trajnimi është thelbësor, por edhe më e rëndësishme është përzgjedhja e më të mirëve, vlerësimi i punës dhe krijimi i mundësive për zhvillim,” shtoi ai.
Ndërkohë, drejtoresha ekzekutive e Qendrës për Menaxhim me Ndryshime (QMN), Neda Maleska Sachmaroska, nënvizoi rëndësinë e krijimit të një kulture të të mësuarit brenda institucioneve publike.
“Nuk mjafton vetëm themelimi i Akademisë; duhet të ndërtojmë një kulturë mësimi që u mundëson punonjësve të zhvillojnë kompetenca të reja,” theksoi ajo.
Maleska Sachmaroska paralajmëroi se trajnimet shpesh shihen si formalitet dhe jo si investim real, duke i bërë thirrje drejtuesve që t’i trajtojnë ato si një investim me kthim të lartë.
“Investimi në dije është investim në të ardhmen e shtetit. Punonjësit duhet ta shohin të nxënit jo si detyrim, por si mundësi për zhvillim personal dhe profesional,” përfundoi ajo.
MARKETING
