Mexhiti: Për herë të parë në Ministri u krijua komisioni mbikëqyrës për parandalimin e shëndetit mendor dhe gjendjes psikosociale të fëmijëve dhe adoleshentëve

Ministri i Shëndetësisë,  Fatmir Mexhiti, foli sot në hapjen e punëtorisë së parë për ngritjen e vetëdijes për parandalimin e shëndetit mendor të fëmijëve, adoleshentëve dhe të rinjve në shtet, përmes përfshirjes së grave udhëheqëse nga bashkësitë lokale.

“Si Ministër i Shëndetësisë, në shtator të këtij viti, për herë të parë në Ministri, kam emëruar një komision mbikëqyrës me përfaqësues nga të gjitha palët relevante në shëndetësi, arsim dhe sektorin social, si dhe përfaqësues të shoqatave profesionale dhe ekspertë të fushës.  Komiteti Mbikëqyrës ka për detyrë të monitorojë aktivitetet në lidhje me parandalimin e shëndetit mendor dhe gjendjes psikosociale të fëmijëve dhe adoleshentëve, në kuadër të programit të përbashkët të OBSH-së dhe UNICEF-it, si dhe të përgatisë një Plan Veprimi Kombëtar me masa dhe aktivitete që synojnë t’i përgjigjen nevojave të shëndetit mendor të brezit të ri, dhe këtë deri në fund të këtij viti”, theksoi ministri Mexhiti, kumtuan nga Ministria e Shëndetësisë.

Rezultatet e fundut nga hulumtimi për sjelljen e fëmijëve të moshës shkollore (11, 13 dhe 15 vjeç) në vendin tonë, të publikuar javën e kaluar, treguan se deri në 57 për qind e vajzave 15-vjeçare raportuan ndryshime të shpeshta të humorit, pothuajse çdo ditë në gjashtë muajt e fundit.

“Është e nevojshme të veprojmë së bashku. Vetëm me një partneritet dhe bashkëpunim të përkushtuar mes institucioneve të ndryshme, të rinjve, prindërve/kujdestarëve, shoqërisë civile dhe organizatave ndërkombëtare, do të mundësojmë mbështetje për shëndetin mendor të fëmijëve dhe adoleshentëve tanë”, shtoi ministri.

Në të njëjtën kohë, ministri Mexhiti falënderoi Zyrat e OBSH-së dhe UNICEF-it në Shkup për mbështetjen e vazhdueshme në realizimin e aktiviteteve që kanë të bëjnë me shëndetin mendor të fëmijëve dhe adoleshentëve, si dhe shoqatës civile “BIOM – Qendra për Zhvillimi i Qëndrueshëm” për angazhimin dhe përkushtimin në përfshirjen e përfaqësuesve së grave udhëheqëse nga bashkësia lokale.

MARKETING