“Marsh për engjëjt” u mbajt në Koçan

Dhimbje dhe të qara. Prindërit dhe të afërmit e të vdekurve në zjarrin në diskotekën “Puls” përmes një marshi protestues paqësor në Koçan kërkuan drejtësi. Nën moton “Marshim për engjëjt” pikërisht pesë minuta pas orës 12 si simbol i reagimit të vonuar institucional, familjet e të ndjerit të veshur me të zeza nga parku i revolucionit në Koçan u nisën për një marshim, i cili u pasua nga heshtja dhe shumë lot.

Marshimi i zi paqësor vazhdoi në Qendrën Tregtare, dhe prej aty në ndërtesën e komunës së Koçanit, komisariatin e policisë dhe në fund në gjykatën themelore dhe prokurorinë. Të afërmit e pranishëm sollën edhe fotografi të të dashurve të tyre që humbën jetën në diskotekën “Puls”.

Pa thënë thuajse asnjë fjalë, ata i dërguan porositë institucioneve përmes disa pankartave në të cilat shkruante “Sistemi i korruptuar vrau fëmijët tanë”, “Marshi për 59 engjëjt”, por edhe “Kjo nuk është aksident, kjo është vrasje”. Nga ana tjetër, hetimi për këtë çështje tashmë është duke u zhvilluar, ku dyshohet për 34 individë dhe tre persona juridikë, të cilët me një sërë mosveprimesh në më shumë se 10 vitet e fundit kontribuan për zjarrin e tmerrshëm.

Të gjithë të dyshuarit akuzohen për shkaktimin e veprave të rënda kundër sigurisë së përgjithshme për të cilat janë parashikuar dënime me burg nga 3 deri në 20 vjet, ndërsa një person, nga ana tjetër, akuzohet për veprën penale të marrjes së ryshfetit. Bëhet fjalë për të punësuar në Ministrinë e Ekonomisë i cili, në këmbim të parave, ka mundësuar që diskoteka të punojë me licencë të falsifikuar.

Hetimi i deritanishëm përfshin shtatë oficerë policorë dhe kryeshefa nga Koçani dhe Shtipi, e në mesin e të arrestuarve janë edhe ish-ministri i Ekonomisë Kreshnik Bekteshi, ish-drejtori i Inspektoratit të Tregut Goran Trajkovski, kryetari i dorëhequr i Komunës së Koçanit Lupço Papazov, por edhe paraardhësit e tij Ratko Dimitrov dhe Nikollço Iliev.

Ish-drejtori i Drejtorisë për Mbrojtje dhe Shpëtim Bekim Maksuti, si dhe ish-sekretarja e Shtetit në Ministrinë e Ekonomisë, Razmena Çekiç, gjithashtu përfunduan pas grilave. Ekipi i prokurorisë që punon për çështjen është zgjeruar në 11 hetues të cilët pritet të kryejnë një marrje në pyetje të mbi 300 dëshmitarëve.

Ndryshe, dje ndërroi jetë edhe viktima e 60-të e zjarrit, pasi autoritetet shëndetësore njoftuan se Aleksandar Karadakovski, i cili po trajtohej në Lituani, iu nënshtrua plagëve të tij. Karadakovski ishte menaxher në diskotekën “Puls”, ku njëherësh punonte edhe si banakier, ndërsa pikërisht ai ishte një nga 34 personat e përfshirë në hetimin për shkaqet e zjarrit.

MARKETING