Liverpool fiton me vështirësi ndaj Wolves, forcon pozitën në garën për titull

Liverpool vazhdoi rrugën drejt titullit të Premier League me një fitore 2-1 ndaj Wolverhampton Wanderers – triumfi i tyre i 16-të në 17 përballjet e fundit mes tyre në kampionat.

Duke pasur një diferencë të shëndetshme pikësh para ndeshjes, Liverpool mund të përballonte një hap fals, por tre pikët ishin objektivi i qartë kundër Wolves.

Skuadra e Arne Slot e nisi fuqishëm ndeshjen dhe brenda 10 minutave krijoi një mundësi të shkëlqyer shënimi, por ish-lojtari i Wolves, Diogo Jota, goditi paksa jashtë pas një aksioni të bukur nga Trent Alexander-Arnold dhe Andy Robertson.

Megjithatë, “The Reds” nuk vonuan shumë për të kaluar në avantazh, ndonëse në rrethana me fat, pasi një largim i gabuar i Toti Gomes çoi topin te Luis Díaz, i cili e dërgoi në rrjetë pa asnjë problem.
Díaz vazhdoi të ishte një problem për mbrojtjen e Wolves, duke asistuar Jotën në zonë, por Emmanuel Agbadou e bllokoi me një ndërhyrje të shkëlqyer.

Liverpool vazhdoi sulmet e pandalshme në pjesën e parë dhe ishte vetëm çështje kohe deri sa të dyfishonin epërsinë. Kjo ndodhi pak para pushimit, kur Mohamed Salah shënoi nga pika e bardhë pas një ndërhyrjeje të gabuar të José Sá ndaj Díaz.

Matheus Cunha u përpoq të kundërpërgjigjej me një goditje dënimi premtuese, por topi kaloi shumë pranë shtyllës.

Wolves patën një mundësi të artë për të ngushtuar rezultatin, kur Marshall Munetsi u gjend i vetëm përballë Alisson, por portieri brazilian e ndali me sukses.

Nga ana tjetër, Liverpool e dërgoi sërish topin në rrjetë me Salah pas një asisti të Alexander-Arnold, por goli u anulua për pozicion jashtë loje.

Ndeshja pati edhe një moment të diskutueshëm rreth minutës së 60-të, kur gjyqtari Simon Hooper akordoi një tjetër penallti për Liverpool pas një ndërhyrjeje të gabuar të Agbadou ndaj Jotës. Megjithatë, pas rishikimit në monitorin e VAR-it, ai e anuloi vendimin e tij.

Wolves përfituan nga kjo mundësi dhe ngushtuan rezultatin me një supergol të Cunha, i cili e harkoi topin bukur përballë tribunës Kop.

Pjesa e dytë ishte shumë larg standardit të zakonshëm të Liverpool, të cilët asnjëherë nuk e ndien veten të sigurt me një epërsi minimale, por ata arritën të ruanin rezultatin dhe të siguronin tre pikë shumë të rëndësishme në garën për titull.

Me këtë fitore, Liverpool e rikthen avantazhin e shtatë pikëve në krye të tabelës kundrejt Arsenalit. Ndërkohë, kjo humbje për Wolves ishte e pritshme dhe i lë ata në një pozitë të rrezikshme pranë zonës së rënies. /Express

MARKETING