Kryeministri malajzian bën thirrje për dialog mes luftës SHBA-Iran në takimin me presidentin Iranian

Kryeministri i Malajzisë, Anwar Ibrahim, ka bërë thirrje për dialog dhe diplomaci për zgjidhjen e konfliktit SHBA-Iran gjatë një takimi me presidentin iranian, Masoud Pezeshkian, në margjinat e Samitit të Liderëve të BRICS-it në New Delhi, transmeton Anadolu.

Anwar në rrjetin social amerikan X tha se kishte shprehur shqetësimin për konfliktin e zgjatur dhe përshkallëzimin e tensioneve në Lindjen e Mesme.

Kryeministri malajzian u bëri thirrje të gjitha palëve të rikthehen në tryezën e negociatave, t’i japin përparësi dialogut dhe diplomacisë për zgjidhjen paqësore të mosmarrëveshjeve dhe të ndalojnë veprimet që mund ta përkeqësojnë situatën.

Anwar tha se Kuala Lumpuri beson se liria dhe siguria e kalimit detar përmes Ngushticës së Hormuzit duhet të vazhdojnë të garantohen në përputhje me të drejtën ndërkombëtare, duke theksuar se çdo ndërprerje do të ndikonte ndjeshëm në sigurinë globale energjetike, tregtinë dhe ekonominë.

Ai tha se të dyja palët shqyrtuan gjithashtu mënyrat për zgjerimin e tregtisë dhe investimeve mes Malajzisë dhe Iranit, përfshirë në sektorët e energjisë, bujqësisë, vajit të palmës, sigurisë ushqimore, industrisë hallall, teknologjisë dhe arsimit të lartë.

SHBA-ja dhe Izraeli nisën një luftë kundër Iranit më 28 shkurt, duke nxitur Teheranin të lëshojë raketa drejt Izraelit dhe të sulmojë objektiva dhe baza amerikane në disa vende të rajonit.

Irani gjithashtu njoftoi mbylljen e Ngushticës së Hormuzit për lundrim, duke shkaktuar ndërprerje të mëdha në flukset globale të energjisë dhe tregtisë.

MARKETING