Kryediplomati spanjoll: Palestinezët duhet të kthehen të jetojnë në Gaza

Ministri i Jashtëm spanjoll Jose Manuel Albares theksoi se banorët e Gazës duhet të kthehen dhe të jetojnë në Rripin e Gazës, duke u zotuar se vendi i tij do të bëjë gjithçka që është e mundur për të ndihmuar në rindërtimin e enklavës bregdetare.

“Ne me të vërtetë duam që ky armëpushim të bëhet i përhershëm dhe jam vërtet i lumtur që shoh se lirimi i pengjeve është rivendosur përsëri”, tha Albares për Anadolu në margjinat e Konferencës së Sigurisë së Mynihut.

Albares vuri në dukje se një armëpushim i përhershëm është në interesin më të mirë të të gjithëve, duke përfshirë sigurinë izraelite.

“Sigurisht, palestinezët e Gazës duhet të kthehen dhe të jetojnë në Gaza”, shtoi më tej Albares, duke iu referuar deklaratave të fundit të administratës amerikane.

Një nga njoftimet më të diskutueshme të presidentit amerikan Donald Trump për politikën e jashtme është plani i tij për të “marrë përsipër” Gazën, që përfshin zhvendosjen me forcë të banorëve palestinezë në vende të tjera, një plan që kritikët argumentojnë se përbën spastrim etnik.

Kryediplomati spanjoll tha se vendi i tij po bën dhe do të bëjë gjithçka që mundet për rindërtimin e Gazës në mënyrë që banorët të shërohen nga trauma dhe të rifillojnë jetën e tyre normale.

“Spanja po bën dhe do të bëjë gjithçka që mundet për të ndihmuar në rindërtimin e Gazës në mënyrë që banorët e Gazës të mund të rifillojnë jetën e tyre normale, si dhe për bashkëjetesën e dy shteteve, shtetit palestinez dhe shtetit izraelit, që duhet të garantojë siguri dhe prosperitet për të dyja vendet”, shtoi ai.

Numri i të vdekurve nga sulmi gjenocidal i Izraelit që nga tetori 2023 është rritur në mbi 48.200, sipas të dhënave të Ministria së Shëndetësisë në Gaza.

Marrëveshja e armëpushimit ka qenë në fuqi në Gaza që nga 19 janari, duke ndalur luftën izraelite që ka shkaktuar shkatërrim të gjerë dhe ka lënë enklavën palestineze në gërmadha.

Gjykata Ndërkombëtare Penale lëshoi ​​urdhrarreste në nëntor për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në enklavë.

MARKETING