Kompania italiane padit Google, kërkon 2.97 miliardë euro dëmshpërblim

Kompania italiane Moltiply Group njoftoi se ka ngritur padi kundër Google, duke kërkuar dëmshpërblim prej 2.97 miliardë eurosh, me argumentin se gjiganti amerikan ka abuzuar me pozitën dominuese në tregun e shërbimeve duke shtypur konkurrencën.

Moltiply operon faqen italiane popullore të krahasimit të çmimeve Trovaprezzi.it.

Kompania pretendon në padinë e saj se Google ndërpreu shërbimin e filialit të saj 7Pixel nga 2010 deri në 2017 në mënyrë që të forcojë pozicionin e Google Shopping, shkruan Reuters, përcjell Telegrafi.

Bëhet e ditur se padia u ngrit në një gjykatë të Milanos.

Ndryshe, kjo nuk është padia e parë e tillë kundër Google.

Në vitin 2017, Komisioni Evropian gjobiti Google me 2.4 miliardë euro për shkeljen e ligjit të konkurrencës, duke i kërkuar që të sigurojë trajtim të barabartë për konkurrentët në segmentin e krahasimit të çmimeve në internet.

Në shtator të vitit të kaluar, Gjykata e BE-së hodhi poshtë ankesën e Google dhe la në fuqi gjobën.

MARKETING