Kina në alarm nga tajfuni “Dolphin”/ Mbi 1,300 fluturime anulohen në Shangai, evakuime masive

Kina Lindore është në gatishmëri të lartë përpara tajfunit “Dolphin”, me autoritetet që po kryejnë evakuime masive, ndërsa më shumë se 1,300 fluturime janë anuluar në dy aeroportet kryesore të Shangait.

MARKETING

Stuhia e fuqishme ka prekur tashmë Tajvanin verior, ku solli shira të rrëmbyeshëm të shtunën, madje edhe në kryeqytetin Taipei. Kushtet e përkeqësuara të motit bënë që linjat ajrore tajvaneze të anulonin fluturimet për në Kinë.

Erërat që shoqëronin “Dolphin” arritën një intensitet maksimal prej afërsisht 162 kilometrash në orë, ndërsa sasitë e mëdha të shiut që pritet të bien në zonat nëpër të cilat do të kalojë janë veçanërisht shqetësuese.

Parashikimet tregojnë se epiqendra e stuhisë do të jetë provinca Zhejiang, si dhe rajonet veriore të Fujianit fqinj. Sasia totale e reshjeve mund të arrijë 200 deri në 400 milimetra në ditët në vijim, duke rritur ndjeshëm rrezikun e përmbytjeve dhe rrëshqitjeve të dheut.

Më shumë se 1,300 fluturime janë anuluar në dy aeroportet kryesore të Shangait, Pudong dhe Hongqiao. Anulimet përfaqësojnë rreth 60% të fluturimeve të planifikuara për të dielën, ndërsa autoritetet dhe linjat ajrore përgatiten për përkeqësimin e kushteve të motit.

Gjithashtu, ekziston një operacion evakuimi në shkallë të gjerë në zonat që konsiderohen më të ndjeshme ndaj kalimit të tajfunit. Në provincën Zhejiang, rreth 390,000 banorë të qytetit Taizhou u evakuuan nga shtëpitë e tyre si masë paraprake.

Masa të ngjashme janë marrë në Shangai, ku më shumë se 30,000 njerëz janë zhvendosur nga zonat e klasifikuara si me rrezik të lartë, ndërsa autoritetet përgatiten për kalimin kryesor të “Dolphin”.

MARKETING