Kanadaja po verifikon nëse Netanyahu do të udhëtojë përmes hapësirës së saj ajrore

Ministrja e Punëve të Jashtme e Kanadasë, Anita Anand tha se po verifikon nëse kryeministri izraelit Benjamin Netanyahu, i cili përballet me një urdhër arresti ndërkombëtar, do të udhëtojë sot përmes hapësirës ajrore kanadeze, transmeton Anadolu.

MARKETING

“Unë në fakt i kam kërkuar departamentit tim që të më japë informacion në lidhje me këtë fluturim të veçantë, të cilin nuk e kisha përpara se të vija në Kombet e Bashkuara”, u tha Anand gazetarëve të mërkurën jashtë selisë së OKB-së në Nju Jork, sipas CTV News.

Megjithatë, Anand nuk pranoi të thoshte nëse Kanadaja e konsideron Netanyahun si kriminel lufte.

“Qëndrimi ynë është të respektojmë vendimet e gjykatave ndërkombëtare dhe të mbështesim në çdo kohë njerëzit që vuajnë, përfshirë ata në Gaza, Palestinë dhe Bregun Perëndimor, dhe të sigurojmë që krimet kundër njerëzimit të trajtohen si të tilla”, tha ajo.

Deklaratat e saj erdhën pasi kryeministri kanadez Mark Carney tha tetorin e kaluar se Netanyahu do të arrestohej nëse ai hynte në Kanada. Si një personalitet i huaj që fluturon në një avion shtetëror, Netanyahu duhet të kërkojë leje diplomatike nga Otava të paktën tre ditë pune përpara se të hyjë në hapësirën ajrore kanadeze.

Në nëntor 2024, Gjykata Ndërkombëtare Penale (GJNP) lëshoi urdhër arresti për Netanyahun dhe ish-ministrin e Mbrojtjes Yoav Gallant, duke gjetur “baza të arsyeshme” për të besuar se ata mbajnë përgjegjësi penale për krimet e dyshuara të luftës dhe krimet kundër njerëzimit në Rripin e Gazës.

Netanyahu është planifikuar të vizitojë Nju Jorkun për të folur në Asamblenë e Përgjithshme të OKB-së të enjten.

MARKETING