Irani: Një cisternë nafte merr flakë pasi godet një minë detare në lindje të Ngushticës së Hormuzit

Një cisternë nafte mori flakë pasi goditi mina detare në lindje të Ngushticës së Hormuzit, njoftoi të martën Marina iraniane, transmeton Anadolu.

MARKETING

Në një deklaratë të publikuar nga agjencia zyrtare iraniane e lajmeve IRNA, Marina tha se cisterna kishte fikur sistemet e saj të gjurmimit dhe po përpiqej të kalonte nëpër një zonë “të kufizuar dhe të pasigurt” kur goditi minat.

Sipas deklaratës, anija pësoi dëme dhe mori flakë pas incidentit.

Marina nuk dha hollësi për identitetin e cisternës, flamurin nën të cilin lundronte, ekuipazhin apo viktima të mundshme.

Ajo tha se Ngushtica e Hormuzit mbetej “e pasigurt dhe e mbyllur” për anijet që përpiqen të kalojnë pa koordinim paraprak.

Marina shtoi se anijet që kërkojnë të kalojnë në mënyrë të sigurt duhet të koordinohen me forcat e armatosura të Iranit.

Incidenti ndodh në një kohë kur po zhvillohen përpjekje diplomatike për t’i dhënë fund konfliktit ku janë të përfshirë Irani dhe SHBA-ja, ndërsa vendet e rajonit po përpiqen të lehtësojnë negociatat dhe të ulin tensionet.

Turqia, Arabia Saudite, Pakistani dhe Irani kanë ruajtur gjithashtu kontaktet diplomatike për sigurinë rajonale, përfshirë diskutimet që synojnë uljen e tensioneve dhe mbështetjen e përpjekjeve për arritjen e një zgjidhjeje të qëndrueshme.

Uashingtoni dhe Teherani nënshkruan një memorandum mirëkuptimi në qershor dhe nisën negociatat, të cilat më vonë dështuan për shkak të mosmarrëveshjeve lidhur me lundrimin në Ngushticën e Hormuzit, një korridor strategjik për furnizimin me energji dhe transportin e mallrave.

MARKETING