Integrimi i Maqedonisë së Veriut në BE është një nga temat e mundshme të takimeve të Blinkenit në Athinë

Integrimi evropian i Maqedonisë së Veriut dhe vendeve të Ballkanit Perëndimor mund të jetë një nga temat që sekretari amerikan i shtetit Entoni Blinken do t’i diskutojë me nikoqirët e tij në Greqi gjatë takimeve javën e ardhshme.

Ndihmëssekretarja amerikane e shtetit për Evropën dhe Euroazinë, Karen Donfrid, duke iu përgjigjur pyetjes së gazetarëve në brifingun në prag të udhëtimit të Blinkenit në Greqi, sa i përket perspektivës së Maqedonisë së Veriut në BE, ajo tha se nuk e di me siguri se cilat do të jenë temat në agjendën e takimeve të Blinkenit në Athinë, por supozon se edhe kjo çështje do të gjendet.

“Mendoj se nuk mund t’ju them saktësisht se për çfarë do të flasë sekretari me kolegët e tij në Greqi, por mendoj se do të jetë një nga temat”, tha Donfrid.

Shtoi se në takime do të diskutohen edhe shumë çështje të tjera si Ukraina dhe Rusia, si dhe tërmetet në Turqi dhe Siri.

Në të njëjtën kohë, theksoi se Greqia është një mbështetëse e fortë si e Maqedonisë së Veriut, ashtu edhe e pjesës tjetër të vendeve të Ballkanit Perëndimor drejt së ardhmes së tyre euroatlantike dhe anëtarësimit në Bashkimin Evropian.

“Sa i përket çështjes së Greqisë dhe Maqedonisë së Veriut, natyrisht që Greqia është aleati ynë i vlerësuar i NATO-s. Është gjithashtu një anëtar kyç i Bashkimit Evropian. Ne kemi parë se Greqia ka luajtur vazhdimisht një rol në mbështetjen e zgjerimit të Bashkimit Evropian përtej Ballkanit”, theksoi Donfrid.

Sekretari amerikan i Shtetit Entoni Blinken nga sot deri më 22 shkurt do të vizitojë Gjermaninë, Turqinë dhe Greqinë.

Në Athinë ai do të takohet me kryeministrin grek Kirjakos Micotakis, ministrin e Jashtëm Nikos Dendias dhe kreun e opozitës SYRIZA Aleksis Cipras.

Të martën, Blinkeni dhe Dendiasi do ta fillojnë raundin e katërt të dialogut strategjik SHBA dhe Greqi.

MARKETING