Incidente dhe përleshje me policinë, 40 tifozë të AEK-ut arrestohen në Bruksel

Policia belge ka arrestuar disa tifozë të AEK-ut pas incidenteve që ndodhën në mesditë (21 gusht) në sheshin qendror Grand Place në Bruksel.
Sipas raportimeve, një pjesë e tifozëve grekë ishin mbledhur në këtë zonë, çka shkaktoi përplasje me forcat e rendit.

Autoritetet lokale konfirmuan se rreth 40 persona janë arrestuar, shumica prej tyre tifozë të AEK-ut, ndërkohë që disa të tjerë mendohet të jenë pjesëtarë të tifozërisë së Union Saint-Gilloise. Policia ndërhyri duke përdorur gaz lotsjelles për të shpërndarë turmën, pasi tensionet u rritën ndjeshëm pas brohoritjeve dhe thirrjeve nga tifozët.
Disa dëshmitarë raportojnë edhe për dhunë fizike, ku disa tifozë grekë janë parë duke u rrahur nga forcat e rendit. Për një periudhë kohe, turma u mbajt e izoluar në një pjesë të ngushtë të sheshit.
AEK kishte siguruar rreth 1,300 bileta për përballjen kundër Anderlecht në kuadër të Ligës së Konferencës, dhe pjesa kryesore e tifozëve zyrtarë ishte në një zonë tjetër, larg vendit të incidentit në momentin e përplasjes.

Deklarata e klubit të AEK-ut

Më vonë gjatë ditës, klubi i AEK-ut publikoi një deklaratë zyrtare, duke paralajmëruar tifozët për pasojat e sjelljes së dhunshme dhe duke kërkuar vetëpërmbajtje.

“Pikërisht për këtë arsye, është e domosdoshme të theksojmë edhe një herë se për fat të keq, përveç penalizimit të mëparshëm që mbajti të mbyllur tribunën ‘Veriore’ në ndeshjen kundër Aris Limassol në Nea Filadelfia, ekipi ynë është sërish i ndëshkuar me pezullim për një ndeshje për të njëjtën zonë të stadiumit,” – thuhet në deklaratë.

Të arrestuarit pritet të lirohen pas përfundimit të ndeshjes, ndërsa autoritetet belge po hetojnë më tej incidentin.

MARKETING