Guardiola jep arsyet pse rinovoi me Man Cityn

Trajneri i Manchester City-t, Pep Guardiola, thotë se nuk mund ta linte klubin pasi pësoi katër humbje radhazi për herë të parë në karrierën e tij si trajner.

Guardiola ka nënshkruar një kontratë dyvjeçare me City-n, e cila do të zgjasë deri në vitin 2027.
53-vjeçari spanjoll iu bashkua City-t në vitin 2016 dhe ka fituar 18 trofe, përfshirë gjashtë tituj të Premier League.

Kontrata e tij e mëparshme duhej të përfundonte në fund të këtij sezoni, por ai nënshkroi një marrëveshje të re pas humbjeve ndaj Tottenham-it, Brighton-it, Sporting-ut dhe Bournemouth-it.

“Ndjeva që nuk mund të largohesha tani. Ndoshta katër humbjet ishin arsyeja,” tha Guardiola për faqen zyrtare të klubit.

“Mendoj se e meritojmë, pas katër humbjeve radhazi, të rikthehemi dhe të përpiqemi të ndryshojmë situatën. Mendoj se e meritojmë të jemi këtu. Nuk dua të tingëlloj arrogant, por kjo është e vërteta.”

Guardiola tha se është i vendosur të ndihmojë City-n të “kapërcejë” situatën e vështirë aktuale dhe të arrijë një nivel ku të jenë “më të qëndrueshëm dhe më konsistentë” për të rifituar lartësitë e mëparshme.

“Duhet ta rikuperojmë këtë, sepse për momentin nuk e kemi, dhe ky është objektivi që duhet të arrijmë,” shtoi ai.

Është hera e parë që Guardiola ka përjetuar një seri të tillë humbjesh – duke përjashtuar penalltitë – në karrierën e tij si trajner.

Guardiola gjithashtu tha se drejtimi i City-t “ka shumë rëndësi” për të dhe se ka “gjithçka që një trajner mund të dëshirojë” në këtë klub.

“Ky është sezoni im i nëntë këtu. Kemi përjetuar shumë momente të mrekullueshme së bashku. Kam një ndjesi të veçantë për këtë klub futbolli,” tha ai.

“Shpresoj që tani të shtojmë më shumë trofe në ato që kemi fituar tashmë. Ky do të jetë fokusi im.”

Raportohej se Guardiola kishte rënë dakord për një kontratë të re të mërkurën, dhe klubi e konfirmoi lajmin një ditë më pas.

MARKETING