Gjermania ‘zhbllokon’ tanket: S’pengojmë dërgimin e ‘Leopard 2’ nga vende të tjera

Gjermania ‘zhbllokon’ tanket: S’pengojmë dërgimin e ‘Leopard 2’ nga vende të tjera

Ministrja e Jashtme e Gjermanisë, Annalena Baerbock ka deklaruar se nuk do ta pengojë Poloninë, nëse kjo e fundit dëshiron të dërgojë tanke të tipit “Leopard 2” në Ukrainë.

Kievi zyrtar i ka bërë disa herë thirrje Perëndimit që t’i ofrojë tanket e prodhuara në Gjermani, që pritet ta ndihmojë në mposhtjen e Rusisë.

Por Gjermania duhet ende të sigurojë tanket dhe ligjet e saj të eksportit u ndalojnë vendeve të tjera që t’i shesin ato.
Ditën e diel, zonja Baerbock tha se Polonia nuk i kishte kërkuar ende leje për eksport. “Për momentin nuk na është bërë një kërkesë, por nëse një gjë e tillë na kërkohet, ne nuk do ta pengojmë”, deklaroi shefja e diplomacisë gjermane.

Ndërkohë, kryeministri i Polonisë, Mateusz Moraviecki tha të hënën se qeveria e tij do t’ia kërkojë autorizimin Berlinit. Por nga ana tjetër ai shtoi se Polonia do t’i dërgojë tanket në Ukrainë edhe nëse drita e gjelbër nuk vjen.

“Edhe në rast se ne nuk e marrim këtë konsensus, ne sërish do t’i dërgojmë tanket tona në Ukrainë, bashkë me tanket e vendeve të tjera”, deklaroi Moraviecki.

Javën e kaluar, kreu i qeverisë polake deklaroi se vendi i tij ishte gati t’i ofronte 14 tanke “Leopard 2” Kievit.

Megjithatë, ai do të preferonte të dëgjonte më parë përgjigjen e konfirmuar nga kancelari Olaf Scholz.