E konfirmon Gjykata: Naim Murseli premtoi 30 mijë euro për vrasjen e gruas së tij në mënyrë dinake

Tre të dyshuarve për vrasjen e 30-vjeçarës Liridona Ademaj Murseli, Naim Murselit (bashkëshorti), Granit Plavës si dhe Kushtrim Kokallës sot Gjykata Themelore e Prishtinës ua ka caktuar nga një muaj paraburgim, raporton Gazeta Sinjali.

MARKETING

Pas masës së caktuar, Gjykata ka dalë me njoftim, ku bëhen të ditura disa detaje nga kryerja e aktit. E njëjta konfirmoi sot se Naim Murseli për të kryer vrasjen e Liridonës i kishte premtuar tashmë ekzekutuesit, Granit Plava 30 mijë euro pagesë.
“Ekziston dyshimi i bazuar se i pandehuri N.M me dashje që ta privojë nga jeta në mënyrë dinake bashkëshorten e tij, ishte marrë vesh me të pandehurin G.P për ta vrarë tani të ndjerën L.M, ku paraprakisht i pandehuri N.M e kishte pajisur me armë të pandehurin G.P dhe kishin inskenuar veprën penale të Grabitjes, e cila është realizuar me datë 29.11.2023 rreth orës 20:25 minuta , në fshatin Bernicë, Komuna e Prishtinës, në atë mënyrë që derisa i pandehuri N.M ishte duke lëvizur me veturën e tij, në të cilën kanë qenë e ndjera L.M dhe dy fëmijët e tyre, papritmas ka dalë para veturës i pandehuri G.P me maskë në kokë dhe revole në dorë, ku sipas marrëveshjes paraprake i pandehuri N.M me fëmijët kishin dalë nga vetura dhe ishte larguar nga vendi i ngjarjes kinse për të ikur, ndërsa në veturë kishte mbetur tani e ndjera, të cilën i pandehuri G.P e kishte qëlluar nga afërsia me një plumb në qafë dhe si pasojë e plagës vdekjeprurëse, e ndjera L.M kishte ndërruar jetë në vendin e ngjarjes, ndërsa për këto veprime i pandehuri N.M, paraprakisht i kishte premtuar të pandehurit G.P shumën e të hollave prej 30,000.00 €”, thuhet në njoftimin e Gjykatës Themelore të Prishtinës.

MARKETING