Dy vjet dënim me kusht për sulmuesin tjetër të Danella Arsovskës

Gjykata Themelore Penale e Shkupit dënoi sot Rexhep Nuredinin – njërin nga dy sulmuesit e kryetares së Qytetit të Shkupit, Danela Arsovska, me dënim me burgim me kusht prej dy vitesh për incidentin në korrik të këtij viti, kur ajo u sulmua fizikisht dhe verbalisht gjatë një vizite në ndërtesat pa leje në lagjen Çair të Shkupit.

Dënimi me burgim me kusht nuk do të zbatohet nëse ai nuk kryen një krim tjetër në pesë vitet e ardhshme.

Vendimi u mor në bazë të pranimit të fajësisë nga i pandehuri Nuredini, të cilin prokuroria e akuzon për dhunë, e dënueshme sipas nenit 386, paragrafi 1 i Kodit Penal.

“Sot, në seancën kryesore dëgjimore, i pandehuri tregoi pendim të sinqertë për atë që kishte bërë, për sjelljen e tij të vrazhdë ndaj palës së dëmtuar. Megjithatë, edhe vetë kryetarja e tregoi virtytin e faljes së të pandehurit për atë që kishte bërë, madje as nuk u bashkua me ndjekjen penale, as nuk bëri kërkesë pasurore-juridike, gjë që ndihmoi në arritjen e dënimit maksimal alternativ në këtë rast. Në këtë rast ka rrethana vërtet lehtësuese, jo vetëm kërkimfalja, pendimi për atë që kishte bërë nga i pandehuri, por edhe premtimi për t’u përmbajtur nga shpërthime të tilla në të ardhmen. Kontributi i tij në përfundimin efikas të kësaj procedure penale ishte i dukshëm”, tha avokati Naser Raufi, avokat mbrojtës i të pandehurit Rexhep Nuredini.

Në fillim të shtatorit të këtij viti, Gjykata Penale e Shkupit dënoi të pandehurin e parë për sulmin ndaj Arsovskës, Sulejman Lamallari, me dy vjet burg. Në seancat dëgjimore para vendimit, ai i mohoi me vendosmëri akuzat se e kishte sulmuar Arsovskën dhe tha se nuk ishte ai sulmuesi në këtë rast, por viktima.