Deputeti Ilir Demiri do të veprojë si i pavarur

Deputeti Ilir Demiri do të veprojë si i pavarur. Për këtë vendim ai e ka njoftuar kryetarin e Kuvendit, Afrim Gashi, njoftuan nga kabineti i kryeparlamentarit.

Demiri u zgjodh deputet në njësinë e gjashtë zgjedhore si kuadër i Aleancës për Shqiptarët nga krahu i Ziadin Selës, parti e cila në zgjedhjet parlamentare garoi në Koalicionin “Fronti Europian” të udhëhequr nga BDI.

Vendimi i Demirit për të vepruar në mënyrë të pavarur vjen pasi Sela paralajmëroi largimin nga koalicioni me BDI-në.

Kryesia qendrore, siç njoftoi Aleanca për Shqiptarët më 18 nëntor, ka vendosur që partia të veprojë në mënyrë të pavarur, ndërsa deputetët e saj në Kuvend do të formojnë një grup të pavarur.

“Pas diskutimeve thelbësore dhe shumë të rëndësishme, anëtarët e kryesisë unanimisht morën vendim për veprim autonom të Aleancës për Shqiptarët, ndërsa në ditët në vijim deputetët e ASh do ta procedojnë në Kuvend vendimin për të vepruar si grup i pavarur”, njoftoi kryesia qendrore e ASh-së, më 18 nëntor.

Në përbërjen e kaluar qeveritare, Demiri ushtronte detyrën e ministrit të Shëndetësisë, nga shkurti deri në qershor të vitit 2024. /SHENJA/

MARKETING