Delegacioni i Komisionit për Çështje Evropiane në Mbledhjen e 21-të të KOSAP-it

Zëvendëskryetari i Komisionit për Çështje Evropiane, Igor Zdravkovski dhe anëtari i Komisionit, Mitko Trajçuleski, morën pjesë në Mbledhjen e Njëzetenjëtë të Konferencës Rajonale të Komisioneve Parlamentare për Integrim/Çështje Evropiane të Vendeve të Përfshira nga Procesi i Stabilizimit dhe Asocimit në Evropën Juglindore (KOSAP). Konferenca u mbajt sot në Kuvendin e Republikës së Shqipërisë në Tiranë.

Siç informojnë nga shërbimi për shtyp i qeverisë, në mbledhje morën pjesë delegacione nga komisionet parlamentare për Integrim/Çështje Evropiane të Shqipërisë, Bosnjë e Hercegovinës, Maqedonisë së Veriut, Serbisë dhe Malit të Zi.

Konferenca u hap nga Kryetarja e Kuvendit të Republikës së Shqipërisë, Elisa Spiropali; ministri i Evropës dhe Punëve të Jashtme i Shqipërisë, Igli Hasani; shefi i Delegacionit të Bashkimit Evropian në Shqipëri, Silvio Gonzato, dhe kryetarja e Komisionit për Çështje Evropiane të Kuvendit të Shqipërisë, Jorida Tabaku. Në fjalimet e tyre theksuan rëndësinë e diplomacisë parlamentare në procesin e integrimit evropian, si dhe nevojën për bashkëpunim të zgjeruar rajonal për përshpejtimin e proceseve reformuese. Në prezantimet e tyre, ata trajtuan shkëmbimin e përvojave dhe praktikave më të mira mes parlamenteve të rajonit, me qëllim forcimin e kapaciteteve institucionale dhe përmirësimin e harmonizimit me standardet evropiane.

Në Konferencën Rajonale pati dy panele. Paneli i parë iu kushtua temës “Njëzet vjet pas Sarajevës, qasje e re ndaj KOSAP – Së bashku më të fortë”, ku fjalime hapëse patën Anjesika Pomaska, kryetare e Komisionit për Çështje Evropiane të Sejmit të Republikës së Polonisë, si dhe ambasadori i Republikës Federale të Gjermanisë në Shqipëri, Karl Bergner. Në fjalimet e tyre, ata trajtuan kryesisht zhvillimin e perspektivës evropiane të Ballkanit Perëndimor gjatë dy dekadave të fundit dhe inkurajuan parlamentarët që të vazhdojnë të luajnë rol aktiv në përshpejtimin e reformave. Lidhur me bashkëpunimin rajonal dhe procesin e integrimit evropian, ata thanë se njihen si fusha kryesore të zhvillimit për Ballkanin Perëndimor. Për arritjen e këtyre synimeve, ata thanë se është e nevojshme të vazhdohen përpjekjet e përbashkëta, me fokus të veçantë në stabilitetin dhe progresin e vendeve të rajonit.

Zëvendëskryetari i KÇE-së, Igor Zdravkovski, theksoi se vendi ynë me pjesëmarrjen aktive njëzetvjeçare në Konferencat e KOSAP-it, tregon përkushtim ndaj vlerave evropiane dhe së ardhmes së përbashkët të rajonit. Integrimi evropian mbetet qëllimi strategjik i vendit dhe reformat që po zbatohen janë thelbësore për përparimin në procesin e anëtarësimit, nënvizoi Zdravkovski.

Paneli i dytë, me temën “Nga diskutimi politik te bashkëpunimi funksional – bashkëpunimi në Ballkanin Perëndimor, qeverisja dhe politikat”, u prezantua nga Monika Petrova, këshilltare e lartë politike e Këshillit të Bashkëpunimit Rajonal (KBR) dhe Albert Hani, sekretar i përgjithshëm i Zyrës Rajonale për Bashkëpunim Rinor (RIKO). Panelistët e theksuan rëndësinë e ndërtimit të mekanizmave praktikë për bashkëpunimin rajonal dhe nevojën për të përmirësuar efikasitetin institucional në menaxhimin e politikave publike.

Anëtari i Komisionit të KÇE-së, Mitko Trajçuleski, në fjalimin e tij tha se rajoni i Ballkanit Perëndimor përballet me ndikime të vazhdueshme nga aktorët joevropianë të cilët kanë interesat e tyre në këtë rajon që ndryshojnë nga ato të BE-së.

“Prandaj, BE-ja nuk duhet të jetë pasive, përkundrazi, tani është momenti kur BE-ja duhet të tregojë lidership dhe të miratojë vendimin e duhur gjeostrategjik, që është që të gjitha vendet e Ballkanit Perëndimor të bëhen anëtarë të saj deri në vitin 2030. Një hap i tillë vendimtar do ta bëjë Evropën më të fortë dhe më të bashkuar, dhe vetë BE-ja do të bëhet një aktor më i madh dhe më me ndikim në skenën ndërkombëtare”, theksoi Trajçuleski.

Delegacioni i Maqedonisë mbajti një sërë takimesh zyrtare gjatë Konferencës Rajonale, duke përfshirë takime shtesë me Marija Kostovskin nga Komiteti për Pakicat Kombëtare të Qeverisë së Shqipërisë; Endrid Fetahu, kryetar i Aleancës Maqedonase për Integrimin Evropian; si dhe me Delegacionin e Gjeorgjisë.

Mbledhja e ardhshme e KOSAP-it do të mbahet në Bosnjë e Hercegovinë në gjysmën e dytë të 2025.

KOSAP është shkurtesë e Konferencës së Komisioneve Parlamentare për Integrim / Çështje Evropiane të Vendeve të Përfshira nga Procesi i Stabilizimit dhe Asocimit të Shqipërisë, BeH-së, Maqedonisë së Veriut, Kroacisë, Serbisë dhe Malit të Zi, e themeluar më 17-18 qershor 2005 në Sarajevë, BeH.

MARKETING