Bordi i Paqes bën thirrje për zbatim “të menjëhershëm” të planit të Trumpit për Gazën pas sulmit izraelit në spital

Bordi i Paqes deklaroi të enjten se plani i presidentit amerikan Donald Trump për paqe në Gaza duhet të zbatohet “menjëherë, pa vonesa të mëtejshme”, pas një sulmi vdekjeprurës izraelit ndaj Spitalit Nasser në Khan Younis, në jug të Rripit të Gazës, por pa e kritikuar Izraelin, transmeton Anadolu.

MARKETING

Bordi tha se “humbja tragjike e jetëve” nënvizon arsyen pse plani duhet të zbatohet.

“Përndryshe, do të vazhdojmë të jemi dëshmitarë të tragjedive në të cilat Hamasi, grupi palestinez, pretendon se Izraeli kryen sulme të qëllimshme ndaj spitaleve, Izraeli këmbëngul se Hamasi i shfrytëzon këto objekte për operacione terroriste, ndërsa në fund çmimin e paguajnë banorët e pafajshëm të Gazës”, thuhet në deklaratën e bordit të publikuar në platformën sociale amerikane X.

Bordi tha se “dënon humbjen e jetës së çdo civili” dhe dënoi Hamasin, por nuk e dënoi sulmin izraelit.

Ai u bëri thirrje të gjitha palëve që “të respektojnë angazhimet e tyre” sipas planit dhe tha se ka krijuar një kornizë strategjike për të garantuar që banorët e Gazës “të mund të jetojnë të sigurt dhe të kenë qasje në kujdesin thelbësor mjekësor në objekte të sigurta dhe të çmilitarizuara”.

“Të gjitha palët duhet t’i japin Bordit të Paqes autoritetin dhe hapësirën e nevojshme operacionale për ta zbatuar këtë kornizë, pa pengesa apo vonesa të mëtejshme”, thuhet në deklaratë.

– Hamasi kundërshton deklaratën e Këshillit të Paqes

Hamasi e kundërshtoi deklaratën e Këshillit të Paqes, duke e akuzuar atë se përvetëson narrativën e Izraelit dhe përpiqet të mbulojë shkeljet e kryera gjatë sulmit ndaj Spitalit Nasser.

Në një deklaratë, grupi tha se qëndrimi i këshillit pasqyron pretendimet çorientuese të Izraelit lidhur me përdorimin e spitaleve për qëllime ushtarake, duke argumentuar se akuza të tilla e zhvendosin përgjegjësinë nga autorët e sulmit te viktimat.

Grupi tha se qëndrimi i këshillit dëshmon njëanshmëri dhe bie ndesh me përgjegjësitë e tij, si dhe me parimet themelore të objektivitetit dhe drejtësisë.

Hamasi dënoi gjithashtu heshtjen ndërkombëtare ndaj veprimeve të Izraelit dhe përpjekjet për të përhapur ato që i cilësoi si pretendime të rreme të ushtrisë izraelite.

Një sulm ajror izraelit shënjestroi katin e dytë të ndërtesës Al-Yasin në kompleksin mjekësor Nasser, në pjesën perëndimore të Khan Younisit, duke vrarë gjashtë persona dhe plagosur më shumë se 20 të tjerë, njoftoi të enjten Mbrojtja Civile e Gazës.

Drejtori i spitalit tha se sulmi shkaktoi dëme të mëdha në repartet e kujdesit intensiv dhe të kirurgjisë.

Radioja e Ushtrisë Izraelite e përshkroi sulmin si një “operacion për vrasje të shënjestruar”, por nuk dha hollësi të tjera.

Sipas Ministrisë së Shëndetësisë në Gaza, në mesin e të vrarëve kishte personel mjekësor, pacientë dhe familjarë apo shoqërues të tyre.

Sulmi ndodhi në një kohë kur Izraeli vazhdon të shkelë marrëveshjen e armëpushimit me Hamasin, e cila hyri në fuqi më 10 tetor 2025. Si pasojë e këtyre shkeljeve, janë vrarë 1.622 palestinezë dhe janë plagosur 5.878 të tjerë.

Që nga tetori i vitit 2023, lufta e Izraelit në Gaza ka vrarë më shumë se 74.600 palestinezë dhe ka plagosur afro 176.000 të tjerë. Shumica e të vrarëve dhe të plagosurve janë gra dhe fëmijë. Lufta ka shkatërruar gjithashtu 90 për qind të infrastrukturës së territorit.

MARKETING