Australi, sulm me bombë ndaj kamionit me mbishkrimin “Palestina e Lirë”
Një kamion me flamur palestinez dhe me frazën: “Palestina e Lirë” u qëllua me bombë në Sidney të Australisë, me pronarët që besonin se sulmi ishte i motivuar politikisht, raportoi të enjten “7News”, transmeton Anadolu.
Pamjet e kamerave të sigurisë kapën një të dyshuar që fshihej rreth automjetit përpara se të hidhte një bombë zjarri poshtë tij në Dharruk. Zjarrvënësi më pas iku në këmbë ndërsa kamioni mori flakë.
Kamioni, i cili ka mbajtur slogane si “Gaza e Lirë” dhe “Palestina e Lirë” për më shumë se dy vjet, ka shkaktuar polemika në internet dhe ka qenë shënjestër e kërcënimeve.
Pronarët thanë se morën kërcënimin më të fundit të dielën, por ky sulm është hera e parë që automjeti është dëmtuar.
“Kjo nxitet nga urrejtja. Është drejtuar ndaj dikujt që po proteston në mënyrë paqësore, duke shprehur në mënyrë paqësore lirinë e tij të fjalës”, tha një pronar.
Policia nuk ka konfirmuar nëse sulmi ishte i motivuar politikisht, dhe se është duke u zhvilluar një hetim.
Australia njohu zyrtarisht “shtetin e pavarur dhe sovran të Palestinës”, njoftoi kryeministri Anthony Albanese më 21 shtator në kompaninë amerikane të mediave sociale, X.
I dërguari i parë special i Australisë për luftën kundër islamofobisë, Aftab Malik tha më 13 shtator se vendi “nuk e ka trajtuar kurrë plotësisht islamofobinë”.
“Realiteti është se islamofobia në Australi ka qenë e vazhdueshme, herë pas here e injoruar, herë të tjera e mohuar, por kurrë e trajtuar plotësisht”, tha Malik.
Këshilli Hebraik i Australisë tha të enjten në X se i dorëzoi Zyrës së Kryeministrit 80 faqe dhe më shumë se 2.700 nënshkrime, duke kërkuar sanksione ndaj Izraelit tani për të “ndaluar gjenocidin” në Rripin e Gazës.
Të hënën, këshilli lëshoi një deklaratë duke i kërkuar qeverisë australiane të vendosë sanksione ndaj zyrtarëve izraelitë, të ndalojë tregtinë e armëve me Izraelin dhe ta mbajë Tel Avivin përgjegjës për “shkeljet flagrante të ligjit ndërkombëtar”.
MARKETING
