Kryeministri polak refuzon bisedimet e thirrura nga presidenti për krizën në Gjykatën Kushtetuese

Kryeministri polak, Donald Tusk, ka deklaruar se nuk do të marrë pjesë në bisedimet e thirrura nga presidenti Karol Nawrocki për zgjidhjen e krizës në rritje lidhur me Gjykatën Kushtetuese të vendit, duke këmbëngulur se mosmarrëveshja për kontrollin e këtij institucioni tashmë është zgjidhur, transmeton Anadolu.

MARKETING

Duke folur për gazetarët në Dublin, pas një samiti evropian, Tusk hodhi poshtë nevojën për negociata të mëtejshme lidhur me Gjykatën Kushtetuese, drejtimi i së cilës është vënë në pikëpyetje që nga ndërhyrja në selinë e saj në Varshavë, dy javë më parë.

“Çështja e Gjykatës Kushtetuese është zgjidhur”, tha Tusk, duke shtuar se presidenti Nawrocki dhe partitë opozitare nuk i kanë pranuar rregullimet e reja.

“Unë nuk pres miratimin e atyre që për vite me radhë shkatërruan sistemin e drejtësisë në Poloni”, shtoi ai.

Tusk tha se gjykata ka rifilluar punën dhe është në rrugën drejt rikthimit të funksionimit të saj të rregullt.

Refuzimi i tij nxjerr në pah përplasjen gjithnjë e më të thellë mes koalicionit qeverisës pro-evropian të kryeministrit Tusk dhe presidentit Nawrocki, aleat i partisë opozitare Ligj dhe Drejtësi (PiS), lidhur me legjitimitetin e gjykatës më të lartë kushtetuese të Polonisë.

Të enjten, Zyra e Nawrockit njoftoi se përfaqësuesit e të gjitha grupeve politike parlamentare ishin ftuar në konsultime të hënën në Pallatin Belweder në Varshavë.

E Majta, një partner më i vogël në koalicionin qeverisës, njoftoi se nuk do të marrë pjesë, ndërsa të njëjtin qëndrim e bëri të ditur edhe Koalicioni Qytetar (KO), partia kryesore e qeverisë së kryeministrit Tusk.

Përfaqësuesit e Partisë Popullore (PSL), Polonia 2050, PiS dhe Konfederatës së krahut të djathtë kanë shprehur gatishmërinë për të marrë pjesë.

Përplasja u përshkallëzua më 30 tetor, kur policia u vendos në Gjykatën Kushtetuese pas raportimit të një gjyqtari për kërcënime dhe shfaqjes së vendimeve të kontestuara për pezullimin e kryetarit të gjykatës, Bogdan Swieczkowski dhe nënkryetarit Bartlomiej Sochanski.

Anna Korwin-Piotrowska, një gjyqtare e lidhur me shumicën e re në gjykatë, më pas mori drejtimin e institucionit.

Swieczkowski dhe Sochanski e kundërshtuan pezullimin e tyre dhe këmbëngulin se vazhdojnë të jenë drejtuesit legjitimë të gjykatës.

Të enjten, Swieczkowski tentoi të kthehej në selinë e Gjykatës Kushtetuese, por nuk iu lejua hyrja. Sipas raportimeve, ai gjithashtu ka kërkuar kufizimin e qasjes në llogaritë bankare të gjykatës për personat që ai i konsideron të paautorizuar.

Mosmarrëveshja për drejtimin e gjykatës është pjesë e një përplasjeje më të gjerë mes qeverisë dhe presidentit lidhur me emërimet në sistemin gjyqësor, kompetencat ekzekutive dhe përpjekjet për reformimin e institucioneve të formësuara gjatë tetë viteve të qeverisjes së PiS-së.

MARKETING