Kryeministri britanik shpreh optimizëm për samitin e ardhshëm me BE-në

Kryeministri britanik, Andy Burnham, është shprehur se beson se gjatë samitit me Bashkimin Evropian (BE) javën e ardhshme në Bruksel mund të arrihet një marrëveshje me përfitime për të dyja palët, transmeton Anadolu.

MARKETING

Duke folur pas takimit të djeshëm me udhëheqësit evropianë në Irlandë, Burnham tha se shpreson që një marrëveshje e tillë të ndihmojë në uljen e çmimeve dhe në nxitjen e ekonomisë së Mbretërisë së Bashkuar.

“Besoj se ekziston mundësia për të arritur një marrëveshje të mirë, e cila do të ishte e dobishme si për Britaninë, ashtu edhe për Evropën. Mendoj se kjo në fakt mund të jetë më afër asaj që njerëzit mendonin se po votonin në vitin 2016 për Brexit-in”, u tha Burnham gazetarëve mbrëmë.

Në prag të samitit BE-Mbretëri e Bashkuar, i cili do të mbahet më 20 nëntor në Bruksel, Mbretëria e Bashkuar dhe BE-ja ranë dakord për një projekt-marrëveshje që synon heqjen e kontrolleve të vendosura pas Brexit-it për eksportet e produkteve ushqimore dhe bujqësore.

Kjo çështje ka shkaktuar debate të ashpra në politikën britanike. Udhëheqësja e Partisë Konservatore, Kemi Badenoch, më herët ka kundërshtuar fuqishëm çdo hap drejt përafrimit me rregullat e BE-së, duke shtuar se kjo “në fakt do të na kthente prapa”.

Ndërkohë, Partia e Gjelbër, ashtu si Partia Laburiste Skoceze, ka bërë thirrje që Mbretëria e Bashkuar të rikthehet në unionin doganor.

Në referendumin e vitit 2016 për Brexit-in, shumica e votuesve britanikë mbështetën largimin nga BE-ja. Mbretëria e Bashkuar dhe BE-ja nënshkruan marrëveshjen e tërheqjes më 24 janar 2020, ndërsa Britania u largua zyrtarisht nga blloku më 31 janar 2020.

MARKETING