Plenkoviq: Dy shtete ia morën Maqedonisë së Veriut 21 vjet në rrugën drejt BE-së, ne jemi konstruktivë ndaj Malit të Zi

Kryeministri kroat Andrej Plenkoviq e përmendi Maqedoninë e Veriut si shembull se sa gjatë mund të zgjasë rruga drejt Bashkimit Evropian dhe theksoi se, pavarësisht gatishmërisë së Kroacisë për të mbështetur përparimin evropian të Malit të Zi, Zagrebi pret zgjidhjen e çështjeve të hapura mes dy vendeve.

MARKETING

Para takimit të Këshillit Evropian në Bruksel, Plenkoviq kujtoi se në samitin e Zagrebit në vitin 2000, Maqedonia ishte përpara Kroacisë në procesin institucional të afrimit me BE-në, por se edhe pas më shumë se dy dekadash ende nuk i ka nisur negociatat e anëtarësimit.

“E keni shembullin e Maqedonisë së Veriut, e cila, kur u mbajt samiti në Zagreb në vitin 2000, ishte përpara Kroacisë në aspektin institucional. Ajo ende nuk i ka nisur negociatat. Janë dy shtete që, le të themi, nga viti 2005 deri në vitin 2026, ia morën Maqedonisë së Veriut 21 vjet në procesin institucional të afrimit me Bashkimin Evropian”, tha Plenkoviq.

Ai shtoi se Kroacia nuk e ka ndjekur këtë qasje ndaj Malit të Zi dhe se po vepron në mënyrë konstruktive, por njëkohësisht këmbëngul në zgjidhjen e çështjeve që i konsideron të rëndësishme për vlerat evropiane dhe marrëdhëniet e fqinjësisë së mirë.

“Kroacia nuk e pranoi atë qasje. Pavarësisht trashëgimisë së vështirë, ne iu qasëm Malit të Zi në mënyrë shumë konstruktive. Në këtë proces konstruktiv, i veçuam çështjet që, sipas nesh, Mali i Zi duhet t’i përmbushë, sepse ato janë pjesë e vlerave evropiane që duhet t’i përvetësojë me anëtarësimin e tij të ardhshëm në Bashkimin Evropian”, tha kryeministri kroat.

MARKETING