Oferta e çmendur nga Turqia për Guardiolën – agjenti i tij zbulon të vërtetën

Agjenti i Pep Guardiolës ka mohuar raportimet se trajneri spanjoll mund të transferohej në Turqi, ku do të ribashkohej me ish-rivalin e tij në Ligën Premier dhe legjendën e Liverpoolit, Mohamed Salah, te Trabzonspor.

Pas raportimeve të tilla, agjenti i Guardiolës është kontaktuar për të verifikuar informacionet dhe ka konfirmuar se spanjolli nuk do të rikthehet në drejtimin e ndonjë klubi apo kombëtareje gjatë sezonit 2026/27, duke mohuar gjithashtu mundësinë e një kalimi te Trabzonspori.

Raportimet u publikuan një ditë më parë dhe pretendonin se Trabzonspori i kishte ofruar Guardiolës një pagë prej 13 milionë eurosh në sezon. Një marrëveshje e tillë do ta vendoste atë në krye të skuadrës turke, ku aktualisht luan Salah.

Sipas gazetës AS, agjenti i Guardiolës ka deklaruar: “Pep nuk do të drejtojë asnjë klub apo kombëtare këtë sezon”.

Që prej transferimit të Salahut, Trabzonspori ka fituar fuqi të madhe ekonomike në Turqi dhe po synon të sfidojë dominimin e Galatasarayt në elitën e futbollit turk.

Galatasaray është në garë për të shkruar historinë, pasi synon titullin e pestë radhazi, që do ta çonte në 27 numrin e trofeve të Superligës turke.

Në historinë e kampionatit turk kanë marrë pjesë 78 skuadra, por vetëm gjashtë prej tyre e kanë fituar trofeun. Trabzonspori, me shtatë tituj, është skuadra e vetme jashtë Stambollit që ka fituar më shumë se një herë Superligën.

Guardiola, megjithatë, mund të ketë ende mundësi të drejtojë në Turqi në të ardhmen, pasi vendimi i tij aktual vlen vetëm për sezonin 2026/27.

Spanjolli raportohet se ka përfituar mbi 20 milionë funte në vit te Manchester City, që do të ishin rreth 23 milionë euro. Në krahasim, oferta prej 13 milionë eurosh nga Trabzonspori do të ishte dukshëm më e ulët.

MARKETING