LSM: Shporta sindikale minimale në muajin maj është 68.743 denarë

Lidhja e Sindikatave të Maqedonisë ka bërë të ditur se vlera e shportës minimale sindikale për muajin maj 2026 në Maqedoninë e Veriut ka arritur në 68.743 denarë, ose rreth 1.115 euro. Krahasuar me muajin prill, kur shporta ishte 68.797 denarë, është regjistruar një ulje simbolike prej vetëm 54 denarësh.

Sipas të dhënave të publikuara nga LSM, pjesa më e madhe e shpenzimeve mujore të një familjeje vazhdon të shkojë për ushqim dhe pije, të cilat përbëjnë 25.475 denarë apo 37,1 për qind të totalit të shportës. Menjëherë pas tyre renditen shpenzimet për banim, ujë, energji elektrike dhe ngrohje me 6.338 denarë, ndërsa për veshmbathje dhe këpucë nevojiten 6.334 denarë në muaj.

Në strukturën e shportës përfshihen edhe shpenzime për transport, komunikime, rekreacion dhe kulturë, arsim, restorante dhe hotele, si dhe shërbime dhe mallra të tjera bazë për jetesë.

LSM nënvizon se barra financiare bëhet edhe më e rëndë për familjet që jetojnë me qira. Sipas përllogaritjeve të sindikatës, në rastin e një banese me qira prej 60 metrash katrorë, vlera e shportës minimale rritet në 84.117 denarë, ndërsa vetëm shpenzimet për banim dhe shërbime komunale arrijnë në 21.713 denarë.

Megjithëse në muajin maj është regjistruar një ulje minimale e kostos së jetesës, LSM vlerëson se çmimet dhe shpenzimet bazë mbeten ende shumë të larta për shumicën e familjeve në vend.

MARKETING