Indeksi i kostos së jetesës në RMV në janar të këtij viti shënoi rritje vjetore prej 3.2 përqind

Indeksi i kostos së jetesës në janar të këtij viti shënoi rritje vjetore prej 3.2 përqind krahasuar me të njëjtin muaj të vitit të kaluar, tregon raporti i fundit i Entit Shtetëror të Statistikës (ESHS).

Në të njëjtën kohë, raporti thotë se indeksi i çmimeve me pakicë është rritur me 1.2 përqind.

Inflacioni, i matur me indeksin e kostos së jetesës, ka rënë me 0.7 përqind në janar krahasuar me muajin paraprak.

Sipas të dhënave nga ESHS-së, ulja e kostos së jetesës është rezultat i çmimeve më të ulëta në disa sektorë. Rënia më e madhe në janar krahasuar me muajin paraprak është regjistruar në grupin e transportit, ku ka pasur rënie prej 9.3 përqind.

Përveç transportit, sektori i informacionit dhe komunikimit gjithashtu kontribuoi në uljen e inflacionit, i cili ishte më i ulët me 1.6 përqind.

Kishte gjithashtu një rënie të kostove në grupin e rekreacionit, sportit dhe kulturës, të cilat ishin më të ulëta me 1.5 përqind në janar.

Veshjet dhe këpucët shënuan rënie prej 1.2 përqind.

Rritje u regjistrua te banesat dhe pajisjet shtëpiake, të cilat në janar ishin një përqind më të larta se muaji paraprak.

Në grupet e restoranteve dhe hoteleve, rritja ishte 0.7 përqind, dhe te pijet alkoolike, duhani dhe narkotikët me 0.1 përqind.

Në janar, krahasuar me muajin paraprak, kostoja e jetesës në grupin e ushqimit dhe pijeve joalkoolike mbeti në të njëjtin nivel si në muajin paraprak, pa ndryshime.

Enti Shtetëror i Statistikave njoftoi gjithashtu se indeksi i çmimeve me pakicë në janar shënoi rënie prej 2.7 përqind krahasuar me muajin paraprak, dhe në bazë vjetore indeksi i çmimeve me pakicë shënoi rritje prej 1.2 përqind.

MARKETING