Takim i ri Putin-Trump në horizont? Moska: Vazhdon dialogu mes SHBA-së dhe Rusisë

Një takim i ri mes Presidentit rus Vladimir Putin dhe Presidentit amerikan Donald Trump në horizont? Kështu deklaroi sot Zëvendësministri i Jashtëm rus, Sergei Ryabkov. Në një intervistë për revistën shtetërore International Affairs, diplomati i lartë tha se kanalet e komunikimit mes dy vendeve vijojnë të funksionojnë dhe se kërkimi për një rrugë të përbashkët përpara “vazhdon”. “Nuk do të përjashtoja asgjë. Kontaktet nuk janë ngrirë dhe dialogu është i hapur.”, u shpreh Ryabkov.

Takimi i fundit Putin–Trump dhe planet e shtyra
Dy liderët u takuan për herë të fundit në Alaska në gusht, por takimi nuk solli ndonjë marrëveshje konkrete mbi përfundimin e luftës në Ukrainë. Një takim i mëvonshëm i planifikuar në Budapest është shtyrë për një kohë të pacaktuar. Sipas Ryabkov, pavarësisht sfidave, bashkëpunimi teknik dhe diplomatik vazhdon përmes kanaleve jo publike.
“Ne punojmë në mënyrë të vazhdueshme. Kanale dhe struktura ekzistojnë dhe funksionojnë siç duhet, edhe pse jo gjithçka duhet diskutuar hapur,” tha ai.
Diplomati rus e përshkroi progresin në ngritjen e dialogut me Uashingtonin si “mbresëlënës”.

Mundësia e një dialogu trepalësh për armët bërthamore
Ryabkov komentoi gjithashtu mbi idenë e një takimi trepalësh midis Rusisë, SHBA-së dhe Kinës, i fokusuar në stabilitetin bërthamor. Ai theksoi se Moska nuk ka ndërmend të ushtrojë presion mbi Pekinin, duke shtuar se Rusia nuk ka marrë ende asnjë propozim zyrtar nga Shtetet e Bashkuara mbi një format të tillë. “Nuk kemi pyetje për t’i bërë Kinës mbi çështjen e kontrollit të armëve,” tha Ryabkov. Presidenti amerikan ka shprehur më herët interesin për përfshirjen e Kinës në bisedimet për reduktimin e armëve bërthamore, krahas SHBA-së dhe Rusisë. Muajin e kaluar, Trump deklaroi se Putin kishte sugjeruar mundësinë e një deeskalimi bërthamor dypalësh, dhe se Pekini mund t’i bashkohej kësaj nisme.

MARKETING