Mes thirrjeve për pezullim, SHBA-ja mbron pjesëmarrjen e Izraelit në Kupën e Botës

Administrata e presidentit amerikan Donald Trump tha se do të kundërshtojë çdo përpjekje për të përjashtuar Izraelin nga Kupa e Botës FIFA 2026, duke kundërshtuar thirrjet në rritje për pezullimin e Izraelit për shkak të fushatës ushtarake në Gaza, transmeton Anadolu.

“Ne do të punojmë absolutisht për të ndaluar plotësisht çdo përpjekje për të përjashtuar ekipin kombëtar të futbollit të Izraelit nga Kupa e Botës”, tha një zëdhënës i Departamentit të Shtetit për “The Athletic” të “The New York Times”. Deklarata është ndarë me shumë media të tjera.

Komentet pasuan kërkesën e një grupi ekspertësh të OKB-së ndaj FIFA-s dhe UEFA-s këtë javë për të pezulluar ekipin kombëtar të futbollit të Izraelit nga garat ndërkombëtare, duke e quajtur një masë të tillë “përgjigje të nevojshme për të adresuar gjenocidin e vazhdueshëm në territorin e pushtuar palestinez”.

Ata iu referuan urdhrit të përkohshëm të Gjykatës Ndërkombëtare të Drejtësisë të 26 janarit 2024, i cili u kujtoi vendeve detyrën e tyre ligjore për të vepruar kundër gjenocidit. Më herët këtë muaj, një komision hetimor i OKB-së deklaroi se Izraeli po kryen gjenocid në Gaza.

Në një konferencë për media të enjten, presidenti i SHBA-së, Donald Trump tha se është i gatshëm të zhvendosë ndeshjet e Kupës së Botës në vitin 2026, që do të bashkorganizohet nga SHBA-ja, Kanadaja dhe Meksika, nëse siguria bëhet shqetësim.

“Nëse ndonjë qytet që mendojmë se do të jetë sadopak i rrezikshëm për Kupën e Botës… nuk do ta lejojmë të shkojë, do ta zhvendosim pak”, tha Trump. Kur u pyet se çfarë do të bënte nëse qytetet pritëse “nuk do të bashkëpunonin”, Trump u përgjigj: “Epo, kjo është një pyetje interesante… por ne do të sigurohemi që ata të jenë të sigurt. Ata drejtohen nga të çmendur të së majtës radikale që nuk dinë çfarë po bëjnë”.

Turneu i vitit 2026 do të zhvillohet nga 11 qershori deri më 19 korrik.

Izraeli është planifikuar të përballet me Norvegjinë në një ndeshje kualifikuese për Kupën e Botës më 11 tetor në Oslo. Federata Norvegjeze e Futbollit tha se të ardhurat nga biletat e ndeshjes do të dhurohen për ndihmë humanitare për Gazën.

Kryeministri i Spanjës Pedro Sanchez javën e kaluar bëri thirrje gjithashtu për përjashtimin e Izraelit nga sportet ndërkombëtare. “Izraeli nuk mund të vazhdojë të përdorë asnjë platformë ndërkombëtare për të zbardhur imazhin e tij”, tha ai. Sipas raportimeve, vendi mund të bojkotojë Kupën e Botës nëse Izraeli kualifikohet.

MARKETING