BE-ja ndan 175 milionë euro për rimëkëmbjen e Sirisë pas heqjes së sanksioneve

Bashkimi Evropian (BE) njoftoi një paketë prej 175 milionë eurosh për të mbështetur rimëkëmbjen sociale dhe ekonomike të Sirisë, pas heqjes së sanksioneve, transmeton Anadolu.

Financimi synon të forcojë institucionet publike, të përmirësojë qasjen në shërbimet bazë dhe të rigjallërojë ekonomitë lokale nëpërmjet projekteve të udhëhequra nga komuniteti në energji, arsim, shëndetësi, bujqësi dhe jetesë, thuhet në një deklaratë.

Mbështetja do të promovojë më tej drejtësinë tranzicionale, llogaridhënien dhe të drejtat e njeriut, duke përfshirë përpjekjet për të adresuar çështjen e personave të zhdukur.

Komisarja Evropiane për Mesdheun, Dubravka Suica, tha se Siria është në një “moment vendimtar” me një shans real për të kaluar nga konflikti në paqe dhe stabilitet.

“Mbetemi të përkushtuar fuqimisht për të mbështetur sirianët në këtë fazë vendimtare”, tha ajo.

Bashar al-Asad, udhëheqësi i Sirisë për gati 25 vjet, iku në Rusi në dhjetor, duke i dhënë fund regjimit të Partisë Baath, e cila kishte qenë në pushtet që nga viti 1963.

Ahmed al-Sharaa, i cili udhëhoqi forcat kundër regjimit për të rrëzuar Asadin, u shpall president për një periudhë tranzicioni në janar. BE-ja hoqi sanksionet ekonomike ndaj Sirisë më herët këtë vit, duke përmendur hapat pozitivë nga autoritetet kalimtare drejt përfshirjes dhe respektimit të ligjit ndërkombëtar dhe të drejtave të njeriut.

MARKETING