Takim Iseni – Filipidu: Me forca të përbashkëta në menaxhimin e migracionit dhe luftën kundër migracionit ilegal

Zëvendësministri i Punëve të Brendshme, Astrit Iseni ka zhvilluar sot takim pune me një delegacion nga Ambasada e Republikës së Greqisë në Shkup, Sofia Filipidu. Ambasadorja është shoqëruar nga Dimitris Kairidis, ish ministër i migracionit dhe azilit dhe atasheu i policisë së Republikës së Greqisë në vend, Dimitrios Liaskos.

Në takim, zëvendësministri Iseni nënvizoi rëndësinë, por edhe përkushtimin e Ministrisë së Punëve të Brendshme të Republikës së Maqedonisë së Veriut për thellimin e bashkëpunimit të ndërsjellë si në nivel strategjik ashtu edhe në atë operacional, duke theksuar se vetëm me forca dhe vullnet të përbashkët mund të arrijmë sukses dhe të jemi efikas në luftën kundër migrimit ilegal dhe në përgjithësi në menaxhimin e migrimeve.

“Të dy palët konfirmuan gjithashtu domosdoshmërinë e bashkëpunimit dhe bashkëveprimit, jo vetëm në baza dypalëshe, por edhe në kuadër të nismave rajonale dhe ndërkombëtare, ku mundësia e shkëmbimit të përvojave, prioriteteve dhe sfidave mund të japë një kontribut të madh në menaxhimin e migracionit dhe luftën kundër të gjitha formave të krimit, duke mundësuar krijimin dhe forcimin e partneriteteve të reja dhe ato ekzistuese”, thuhet në kumtesë.

Takimi përfundoi me një bindje nga të dyja palët për bashkëpunim të mëtejshëm intensiv në të gjitha fushat e veprimtarisë së Ministrisë së Punëve të Brendshme.

MARKETING