Irani heq kufizimet e aksesit në WhatsApp dhe Google Play
Irani njoftoi sot heqjen e kufizimeve në aksesin në platformat perëndimore të internetit të përdorura gjerësisht, duke përfshirë aplikacionin popullor të mesazheve WhatsApp dhe dyqanin e aplikacioneve Google Play, transmeton Anadolu.
Sipas agjencisë iraniane të lajmeve IRNA, në një takim të Këshillit Suprem të Hapësirës Kibernetike të Iranit, “anëtarët arritën një konsensus për të hequr kufizimet e aksesit në platformat e huaja të përdorura gjerësisht, duke përfshirë WhatsApp dhe Google Play”.
Vendimi u mor gjatë një takimi ku morën pjesë zyrtarë të lartë të qeverisë, ministra të kabinetit dhe anëtarë të këshillit.
Megjithatë, sesioni nënvizoi “rëndësinë e qeverisjes së rregulluar në hapësirën kibernetike dhe nevojën për të mbështetur platformat vendase”, shtoi agjencia.
“Sot, ne hodhëm hapin e parë drejt heqjes së kufizimeve të internetit me unitet dhe bashkëpunim. Unë falënderoj presidentin, mediat dhe aktivistët për përpjekjet e tyre. Ne kemi nevojë për këtë solidaritet më shumë se kurrë. Kjo rrugë vazhdon”, komentoi në X Sattar Hashemi, ministri iranian i Teknologjisë së Informacionit dhe Komunikimit.
Sipas agjencisë, masa përputhet me premtimin e fushatës së presidentit Masoud Pezeshkian për të lehtësuar kufizimet në internet dhe për të zgjeruar aksesin për qytetarët iranianë.
MARKETING
