Shefi i OKB-së: Zjarret e furishme në Lindjen e Mesme po kthehen shpejt në ferr
Sekretari i përgjithshëm i Kombeve të Bashkuara (OKB), Antonio Guterres, ka paralajmëruar mbi dhunën në rritje në Lindjen e Mesme, duke theksuar përkeqësimin e ndjeshëm të situatës në Liban, raporton Anadolu.
“Zjarret e furishme në Lindjen e Mesme po kthehen shpejt në ferr”, tha Guterres në një seancë të Këshillit të Sigurimit mbi situatën në Lindjen e Mesme.
Ai theksoi se “saktësisht një javë më parë”, informoi Këshillin e Sigurimit për situatën alarmante në Liban.
“Që atëherë, gjërat kanë shkuar nga e keqja në shumë, shumë më keq”, u shpreh ai.
Shefi i OKB-së përsëriti vërejtjet e tij në Këshillin e Sigurimit nga java e kaluar, duke theksuar se, “Linja e Kaltër ka parë tensione për vite me radhë. Por që nga tetori, shkëmbimet e zjarrit janë zgjeruar në shtrirje, thellësi dhe intensitet”.
Guterres po ashtu shprehu shqetësim për numrin në rritje të humbjeve të jetës së civilëve dhe paqëndrueshmërinë në rritje në rajon.
“Koha është për të ndaluar ciklin e mërzitshëm të përshkallëzimit pas përshkallëzimit që po i çon njerëzit e Lindjes së Mesme drejt mbi shkëmb”, tha Guterres.
Më tej, ai tha se çdo përshkallëzim i ri po përdoret si pretekst për dhunë të mëtejshme, me çka krijon një cikël vdekjeprurës dhe shkatërrues.
“Ky cikël vdekjeprurës i dhunës kokë më kokë duhet të ndalet”, theksoi Guterres, duke shtuar se koha po mbaron për të parandaluar që situata të çojë rajonin në kaos të mëtejshëm.
Dje, Irani hodhi rreth 180 raketa në drejtim të Izraelit, duke theksuar se është në hakmarrje për vrasjet e fundit të liderit të Hamasit, Ismail Haniyeh, shefit të Hezbollahut, Hassan Nasrallah dhe një komandanti të Gardës Revolucionare të Iranit (IRGC).
Më pas, Izraeli u zotua se do t’i përgjigjet sulmit në një kohë të përcaktuar prej tij, si dhe veprimin e Iranit e quajti një “përshkallëzim të rëndë dhe të rrezikshëm”.
Tensionet rajonale janë përshkallëzuar pas ofensivës së pamëshirshme gati njëvjeçare të Izraelit ndaj Rripit të Gazës, e cila ka vrarë të paktën 41.600 palestinezë, shumica prej tyre gra dhe fëmijë.
Konflikti u përhap edhe në Liban, me Izraelin që nisi sulme vdekjeprurëse në të gjithë vendin, ku që nga 23 shtatori ka vrarë më shumë se 1 mijë njerëz dhe ka plagosur afër 3 mijë të tjerë.
MARKETING
