Koreja e Veriut zbulon për herë të parë objektin sekret të pasurimit të uraniumit

Koreja e Veriut ka zbuluar publikisht një uzinë të pasurimit të uraniumit për herë të parë, sipas agjencisë së lajmeve Yonhap të Koresë së Jugut, ndërsa udhëheqësi Kim Jong Un bëri thirrje për një zgjerim të aftësive bërthamore të vendit,

Gjatë një vizite në Institutin e Armëve Bërthamore dhe në një bazë prodhimi për “materialet bërthamore të nivelit të armëve”, Kim ka theksuar nevojën për të rritur numrin e centrifugave për pasurimin e uraniumit, duke synuar rritjen eksponenciale të prodhimit të armëve bërthamore për vetëmbrojtje, tha media shtetërore e Koresë së Veriut sot.

Vizita e tij, siç raportohet nga Agjencia Qendrore Koreane e Lajmeve (KCNA), përfshinte një vizitë në dhomën e kontrollit në bazën e pasurimit të uraniumit, ku ai shqyrtoi funksionimin e linjave të prodhimit.

KCNA vuri në dukje se Kim ka shprehur kënaqësi të madhe pasi është informuar se baza “prodhon në mënyrë dinamike materiale bërthamore”. Ai nuk e ka bërë të ditur vendndodhjen e objektit apo datën e vizitës së tij.

Kjo ngjarje shënon herën e parë që Koreja e Veriut ndan publikisht detaje në lidhje me aftësitë e saj të pasurimit të uraniumit.

Objektet e pasurimit të uraniumit janë kyç për prodhimin e uraniumit shumë të pasuruar, i cili është thelbësor për prodhimin e kokave bërthamore.

Agjencitë e inteligjencës të Koresë së Jugut dhe të SHBA-së kanë identifikuar më parë lokacione të dyshuara pasurimi në kompleksin bërthamor Kangson pranë Phenianit dhe në Yongbyon.

Kim gjithashtu ka bërë thirrje për përmirësime në kapacitetin e ndarjes së centrifugave dhe zhvillimin e llojeve të reja të centrifugave për të forcuar prodhimin e materialeve bërthamore të shkallës së armëve.

Në fillim të këtij muaji, gjatë një dialogu kyç midis Koresë së Jugut dhe SHBA-së lidhur me parandalimin, aleatët paralajmëruan provokime të mundshme nga Koreja e Veriut, duke përfshirë një test të mundshëm bërthamor ose lëshim rakete balistike ndërkontinentale afër zgjedhjeve presidenciale të SHBA-së në nëntor.

MARKETING