Estonia refuzon të marrë pjesë në takimet e organizuara nga Hungaria

Estonia i bashkohet bojkotit të presidencës hungareze të BE-së dhe nuk do të dërgojë ministra në takimet e BE-së që mbahen në Hungari.

“Hungaria ka abuzuar me presidencën e saj të BE-së me veprimet e saj dhe ka dëmtuar seriozisht besueshmërinë e saj,” tha një zëdhënës i qeverisë në radion estoneze të premten, sipas DPA.

Hungaria aktualisht mban presidencën e rradhës gjashtëmujore të Këshillit të Bashkimit Evropian. Kjo do të thotë, ndër të tjera, se vendi është përgjegjës për organizimin e një numri takimesh joformale ministrore.

Kryeministri Viktor Orban ka marrë kritika të ashpra nga vende të tjera të BE-së për udhëtimet në Moskë dhe Pekin dhe për vizitën e kandidatit republikan për president Donald Trump në Florida.

Suedia dhe Lituania ishin të parat që njoftuan se nuk do të dërgojnë ministra në takimet në Hungari, ndërsa Letonia ka thënë se do të shqyrtojë çdo takim individual.

Estonia vazhdon të marrë pjesë në takimet zyrtare të BE-së në Bruksel, sipas zëdhënësit.

Orban bëri një vizitë të papritur në Moskë në korrik në një “mision paqeje” të vetëshpallur për të zhvilluar bisedime me presidentin rus Vladimir Putin. Ai u prit me kritika të forta nga shumë vende të BE-së, përfshirë Estoninë, një nga mbështetësit më të fortë të Ukrainës.

Pas udhëtimit, shefi i punëve të jashtme të BE, Josep Borrell njoftoi një bojkot të një takimi të planifikuar të ministrave të jashtëm në Budapest. Në vend të kësaj, ministrat u takuan në Bruksel.

MARKETING