Ushtria izraelite tërhiqet nga brenda spitalit Nasser, por vazhdon ta mbajë atë nën rrethim

Ministria e Shëndetësisë me bazë në Rripin e Gazës ka bërë të ditur se ushtria izraelite është tërhequr nga brenda kompleksit mjekësor Nasser në jug të enklavës, por vazhdon ta mbajë nën rrethim ndërtesën, si dhe spitalin Al-Amal aty pranë, transmeton Anadolu.

Ministria palestineze në rrjetet sociale njoftoi se forcat pushtuese izraelite po pengojnë lëvizjen drejt dhe nga kompleksi mjekësor Nasser në qytetin Khan Younis.

Në njoftimin e ministrisë theksohet se stafi mjekësor ka varrosur 13 pacientë të vrarë në spitalin Nasser si pasojë e ndërprerjes së gjeneratorëve dhe furnizimit me oksigjen si rezultat i rrethimit të ushtrisë izraelite, por nuk përmendet data e vdekjes së tyre.

Duke theksuar se ujërat e zeza kanë vërshuar katet përdhes të spitalit, ministria tha se, “Pushtimi ende pengon riparimin e rezervuarëve të ujit, rrjetit të ujërave të zeza dhe funksionimit të gjeneratorit elektrik në spital”.

Të martën, ministria palestineze tha se është rritur në tetë numri i vdekjeve në njësinë e kujdesit intensiv në spitalin Nasser, të cilit Izraeli i ndërpreu energjinë dhe pengoi funksionimin e makinës së oksigjenit.

Në spitalin Al-Amal, po ashtu në Khan Younis, ministria tha se forcat izraelite “vazhdojnë ta rrethojnë dhe shënjestrojnë atë në mënyrë të përsëritur”.

“Forcat pushtuese po rrezikojnë jetën e ekipeve mjekësore dhe pacientëve në spital për shkak të mungesës së ujit, ushqimit, oksigjenit dhe trajtimit”, paralajmëroi ministria.

Për javë të tëra, ushtria izraelite ka përshkallëzuar fushatën e saj ushtarake kundër sistemit të kujdesit shëndetësor në Khan Younis, ditët e fundit duke detyruar edhe mijëra palestinezë të zhvendosur të largohen nga spital Al-Amal dhe kompleksi mjekësor Nasser.

Izraeli ka goditur Rripin e Gazës që nga 7 tetori, duke vrarë të paktën 29.410 palestinezë dhe duke plagosur rreth 70 mijë të tjerë, ndërsa nga ana tjetër, besohet se më pak se 1.200 izraelitë u vranë në sulmin ndërkufitar të Hamasit më 7 tetor.

Sipas Kombeve të Bashkuara (OKB), lufta izraelitë në Gaza ka çuar në zhvendosjen e brendshme të 85 për qind të popullsisë së territorit të rrethuar mes mungesës akute të ushqimit, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruar.

Për herë të parë që nga krijimi i tij në vitin 1948, Izraeli akuzohet në Gjykatën Ndërkombëtare të Drejtësisë për gjenocid për luftën e tij në Gaza, pasi një vendim i përkohshëm në muajin janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.

MARKETING