Kurti viziton policin e plagosur: Predha ishte e një granate dore që e hodhën kriminelët e orkestruar nga Serbia

Kryeministri i Kosovës, Albin Kurti ka vizituar policin e plagosur Alban Rashiti, i cili mbeti i plagosur sot në veri.
Kurti ka thënë se polici ishte plagosur në krahërorin e majtë, transmeton Telegrafi.

“Operacioni i heqjes së predhës nga krahërori i majtë i policit Alban Rashiti është kryer me sukses sot në mëngjes. Predha ishte e një granate dore që e hodhën kriminelët e orkestruar nga Serbia në drejtim të policisë së Kosovës gjatë sulmit të tyre terrorist afër urës në Banjskë të Zveçanit”, thotë ai.

Kryeministri shton tutje se gjatë vizitës në Klinikën Kirurgjike të QKUK-së ka takuar edhe familjen e Albanit e cila erdhi nga Velekinca e Gjilanit.

“Polici i plagosur Alban Rashiti do të lirohet sot nga spitali”.
Gjithashtu, kryeministri konfirmoi se në ora 10:00 do të kenë mbledhje të Këshillit të Sigurisë të Republikës së Kosovës.

Nga sulmet në veri, një polic u vra, një u plagos dhe një tjetër u lëndua.

MARKETING