(VIDEO) Krerët shtetërorë: Sot Maqedonia e Veriut është bërë vend evropian

Krerët më të lartë shtetërorë kanë uruar qytetarët për përvjetorin e shpalljes së pavarësisë. Ata kanë marrë pjesë në ceremoni të ndryshme, përfshirë këtu edhe vënien e kurorave në varret e ish-presidentëve Kiro Gligorov dhe Boris Trajkovski.

MARKETING

Duke uruar qytetarët, presidenti Stevo Pendarovski deklaroi se vendi ka shumë njerëz të zgjuar dhe të virtytshëm, njerëz që mund të rikthejnë frymën e republikës maqedonase bazuar në vlerat themelore kushtetuese dhe të përgjithshme civilizuese.

STEVO PENDAROVSKI, PRESIDENT

“Vetëm kështu do ta ruajmë farën e shpresës se pas më shumë se 3 dekadash do të kemi më në fund një Maqedoni evropiane dhe demokratike në të cilën të rinjtë do të duan të jetojnë dhe të përparojnë. Jam i bindur që kemi forcë dhe vullnet për një gjë të tillë! Gëzuar Ditën e Pavarësisë! Qoftë e përjetshme republika maqedonase”

Edhe kryeministri Dimitar Kovaçevski deklaroi se ditën e pavarësisë e mirëpresin në një vend të përparuar, anëtar të NATO-s dhe me perspektivë reale për anëtarësim në Bashkimin Evropian deri në vitin 2030.

DIMITAR KOVAÇEVSKI, KRYEMININISTËR

 “Sot jetojmë në një vend me kufij territorialë të siguruar.Me gjuhën e njohur maqedonase dhe identitetin maqedonas. Një shtet që është shembull i respektimit të të drejtave të njeriut, si një demokraci funksionale e suksesshme, multietnike dhe multikulturore. Evropë e vogël”

Kovaçevski ka vlerësuar se 8 Shtatori i sotshëm, bën thirrje për vendimmarrje të lirë si detyrë demokratike, për një jetë më të mirë për brezat e tanishëm dhe të ardhshëm. “Qytetarët sot duan të jetojnë në një vend kaq modern, i cili është pjesë e Bashkimit Evropian”, deklaroi Kovaçevski.

Qytetarëve ua ka uruar pavarësinë edhe kreu opozitar Hristijan Mickoski, i cili ka zgjedhur të shkojnë në majën e Gurit të Zi në Jabllanicë. “Gëzuar pavarësinë, qoftë e përhershme Maqedonia e Veriut”, ka deklaruar Mickoski. /SHENJA/

MARKETING