(VIDEO) Mariçiq: Misioni i BE-së është normal

Misioni vlerësues i BE-së i cili aktualisht ndodhet në vend nuk duhet kuptuar si diçka e jashtëzakonshme, sepse në 7-8 vitet e fundit kemi pasur dhjetë misione të tilla, vlerësoi zëvendëskryeministri për Çështje Evropiane, Bojan Mariçiq.

Ai tha se ky është rezultat i konferencës së parë ndërqeveritare që u mbajt vitin e kaluar në korrik. Sipas Mariçiqit, Këshilli Gjyqësor ka nevojë për ndihmë dhe është bërë vlerësimi se ka nevojë për përmirësim, prandaj ekspertët evropianë kanë ardhur për të bërë një inspektim për mënyrën e funksionimit të tij, pas së cilës do të japin rekomandim. Mariçiq tha se korniza ligjore është bërë sipas rekomandimeve evropiane, por dobësitë që duhet të tejkalohen janë të dukshme.

BOJAN MARIÇIQ, ZËVENDËSKRYEMINISTËR PËR ÇËSHTJE EVROPIANE

“Në bazë të këtij misioni vlerësues, ne kemi bërë ndryshime dhe plotësime në Ligjin për Akademinë për Gjyqtarë dhe Prokurorë Publikë. Si rezultat i misioneve të tilla vlerësuese, ne presim rekomandime që duhet të përmirësojnë punën e organeve të pavarura. Si rezultat i një misioni të tillë vlerësimi, kemi pasur misione vlerësimi për sistemin e prokurimit publik dhe mbikëqyrje të duhur. Kemi pasur edhe për gjyqësorin edhe për pjesë të veçanta të gjyqësorit”.

Sa i përket misioneve të mëparshme vlerësuese, Mariçiq renditi misionet për trajnime në gjyqësor, për të drejtën administrative, për luftën kundër terrorizmit, për rastet e korrupsionit të profilit të lartë dhe për lirinë e shprehjes.

Medina Ajeti Ali /SHENJA/